ئافرەت و مێدیا و کێشەی کۆمەڵایەتی
هاودەنگ فارووق
( پیاوسالاری) وشەیەكی باوی نێو مێدیای كوردییە، ڕۆژانە لەنێو خەڵکدا بە چەندان مانا و مەبەستی ڕووپۆشکراو دووپاتە دەکرێتەوە.
لەبەر ڕۆشنایی ئەم پێناسەدا كە بۆ كۆمەڵگەی كوردستان كراوە، دەبینین ڕۆژانە دیاردە و كاردانەوەكانی پیاوسالاری ڕۆشنتر دەبینرێن و دەبیسترێن، واتا پیاوسالاری كە هەژموونی خۆی بەسەر مێدیا و تەواوی بوارە جیاوازەكانی ژیان و خێزانی كوردیدا داناوە. پرسیار ئەوەیە، ئایا مێدیای كوردی لە ماوەی تەمەنیدا، چی بۆ ئافرەتان كردووە؟ ئەی ڕۆڵی ژن خۆی بۆ كرانەوەی كۆمەڵگە و بەگژداچوونەوەی ئەو كۆتوبەندانەی لە سەر ژیانیاندا هەیە چی بووە ؟
من وای دەبینم هەروەك چۆن پیاوان لەنێو مێدیای كوردیدا نەیانتوانیوە بە شێوەیەكی بابەتیانە دیاردەی توندوتیژیی دژ بە ژنان بخەنە ڕوو، بە شێوەیەك كە بتوانێ پرەنسیپەكانی گۆڕان لە عەقلیەت و ئەو جۆرە بیركردنەوانەدا بە دوای خۆیدا بەجێ بهێڵێت، كە هەژموونی پشت ئەو دیاردەیەن، بە هەمان شێوە و بگرە خراپتر، ژنانیش لە ژێر هەمان كاریگەری تێڕوانینەكانی پیاواندا بوونە .
بە داخەوە ئەوەی مێدیای كوردی لەو بارەیەوە كردوویەتی لە سنووری ڕووماڵی هەواڵ و خستنەڕووی ڕووداوە كارەساتبارەكانی دژ بە ئافرەتان لەسەر لاپەڕەی ڕۆژنامەكاندا تێپەڕ نەبووە، بەشێك لە مێدیا كەم و زۆر خۆی لە قەرەی توندووتیژییەكانی دژ بە ژنان نادات، لەو خراپتریش هەیە، مێدیایەكە كاتێك لاپەڕەكانی واڵادەكەیتەوە، تەنها هەواڵی ژنكوژ و قوربانییەكان بڵاو دەكاتەوە، بە جۆرێك سووكایەتی بە ژن دەكات و دەنووسێت: لە سەر ( كێشەی كۆمەڵایەتی كوژراوە ) بێئەوەی پێمان بڵێت : ئەو كێشە کۆمەڵایەتییانە چین کە لە سێبەریاندا كچان و دایكانی كورد لەنێو دەبرێن؟! لە باتی وەك تاوان لەسەری بدوێت و هانی یاسا دنیایی و ئاسمانییەكان و پیاوانی ئایینی بدات، لە جیاتی ئەوەی بە گژ ئەو عەقلیەتەدا بچێتەوە، كەچی دەستەواژەی (كێشەی كۆمەڵایەتی) دەكاتە بەرگی داپۆشینی تاوانێكی گەورە و لە ناوبردنی مرۆڤێک.
مێدیای كوردی زوڵمێكی گەورەی لە ئافرەت كردووە و دەیكات، مێدیای كوردی مێژوویەكی خراپ بۆ خۆی تۆمار دەكات، ئەگەر نەبێتە بەشێكی سەرەكی لە هۆكاری هۆشیاركەرەویەكی بەرچاو لەنێو خێزان و كۆمەڵدا، كە بە شێوەیەكی زانستی ڕێگەچارەكانی ئەو دەردە كۆمەڵایەتییانە بدۆزێتەوە.