ئه‌سعه‌د عه‌دۆ
بیرەوەری سریفەوانێك
(سریفە)جۆرە خانوێكە لە خوارووی عێراق لە (پەلكی دارخورما ، قامیش)دروست دەكرێت ، به مه‌زنده تا ئێستایش ئەوجۆرە خانوانە لە لێواری زەڵكاوی (چبایش و الطار) خەڵكی تێدا دەژیت !
كاتێ لە مانگی تشرینی یەكەمی ساڵی(1975)نزیكەی (90)هەزار كورد لە ئێرانەوە بە سنووری (المنذریه) گەڕانەوە عێراق و لە شارەكانی (حیللە ، دیوانیە ، سەماوە ، ناصریە) بەزۆرەملێ لەنێو سریفەكاندا نیشتەجێكراین ! رژێم به‌نیشته‌جێكردنی ئێمە دەیویست چەند چۆڵەكەیەك بە بەردێك بكوژێت ! كوردی سوننە مەزهەب لە هەواری شیعە مەزهەبدا پەرشوبڵاو بكات !
رژێم به فه‌رمی به(جیب العمیل)ناوزه‌دیان كردبوین ، هه‌موومانیان به‌سه‌ر هۆزه‌كان دابه‌ش ده‌كردین كه رۆژانێك منداڵانی ئه‌وانه له‌شه‌ڕی كوردستاندا كوژرابوون ! هێشتا سه‌دای (ترگاعە لفت برزان بیس باهل العمارە)له ئاسمانی ئه‌و شارانه‌دا ده‌زرینگایه‌وه !
رژێم زۆر هه‌وڵیدا ئه‌و خه‌ڵكانه‌ی ئێمه به فه‌رمی په‌ڕاوه‌كانیان(نفوس ، ده‌فته‌ر خدمه)بۆ دەزگای شارەكانی خوارووی عێراق بگوازنه‌وه ! رژێم خەڵكی ئێمەیان لە هەموو شوێنێك دادەمەزراند تاكو پابەندی ئەوێ بین ، گەڕانەوە یان سەردانی (شمالنا الحبیب)بۆ عه‌یامێك قەدەغەكرا ! بەڵام رژێم نەیتوانی چۆك بە كورداندا بدات بۆیە لەدواییدا بە دوو قۆناغ لە ساڵی 1977 و 1979 ئێمەمانانیان گەڕاندەوە زێدی بابوباپیران .
ماڵە كوردێكی دۆڵی باڵەییان كە عارەبیان نەدەزانی لە نزیك ماڵە شێخێكی ناوچەی (گرمە بنی سعید) سریفەیان بۆ دروست كرابوو ، نەك ئەوان بەڵكو هەموومان بۆ هەفتەیەك سێ جەم خواردنمان لە ماڵەكانی دەوروبەر بۆ دەهات !
لە دوای هەفتەیەك شێخەكە سەردانی بەڕێوەبەری ناحیه (مشاری مسیر جازع)كرد و سەربردەی چۆنیەتی كوشتنی كوڕەكەی لە كوردستاندا بۆ باسكردبوو ئینجا گوتبووی : وەك نەریتی خۆمان ئەركی میوانداریمان جێبەجێ كرد ! ئێستایش هاتووم بۆ ئەوەی هاریكاریم بكەی تاكو ماڵی (كاكە) لەلای ئێمەوه بۆ شوێنێكی دیكە بگوازرێته‌وه ، نەوەك رۆژێك دابێت هەرزەكارێكمان لە حەژمەتان دڵی (كاكە) بڕەنجێنن ، منیش سۆدرەی دونیاو قیامەت بم !
له‌دوای هاتنی ئه‌و سیاسیه شیعانه و هه‌ڵسوكه‌وتی نامرۆڤانه‌و نایاساییان ده‌گه‌ڵ خه‌ڵكی كوردستانیان به هه‌موو مانایه‌ك مه‌نده‌هۆش ده‌بم !
ئه‌مه‌یش نموونه‌یه‌كی دیكه(محمد نصرالله البوصالح )كه وه‌ك پیاوماقوڵێكی شاره‌كه چۆن رووبه‌ڕووی پارێزگای ناصریە (سعدی عیاش عریم – ابو وقاص) سوننە مەزهەب لەسەر (الاكراد كلهم ابو گێوە) تووشی دەمەقاڵ ده‌بێ و پێی ده‌ڵێ : چۆن رێگا بەخۆت دەدەی ئازاری سه‌بایەی ئیمام حسینی سەدەی بیست بدەی ، ئەوانە بەلەنگازن مشەختن خۆ ئێمە نەبووینە (بەنی ئوممەیە ؟!)
كاتێ شێخی نەمر لە ساڵی 1914 بەهانای مەرجەعی شیعە (ال تەبەتەبائی)ده‌چێ ، ئەوانە بوون پێشوازیان لێكردو گوتیان : (ثلثین الدنیا الهادینا ثلث الكاكە أحمد و اكرادە)ئەوانەی باسیان ده‌كه‌م نموونه باشه‌كانن دوورن له هه‌ڵسوكه‌وتی ئه‌و سیاسیه دڕندانه‌ی ئه‌وڕۆی به‌غدا !
كاتێ هەموو زانایانی عەرەبی سوننە بۆ سەلام عارف جاڕی قەتلوعامی كوردانیاندا كەچی گەورە مەرجەعی شیعە (عبدالمحسن الحكیم) رووبەرووی رژێم گووتی : هەر سەربازێك لەسەر خاكی كوردان بكوژرێ شەهید نیەو شەڕی كوردانی حەرام كرد ! لەنێویاندا جوامێری ئەوتۆی تێدایە
كه‌چی بەداخەوە حیزبی الدعوه‌و زۆربه‌ی شیعه‌كان لە رۆژانی كۆنگرەی (ڤیینا) كە خاوەنی هیچ نەبوون ! دانیان بە واقیعی ئەوكاتی كوردستان دانەدەنا ! لە سەرەتای رووخانی رژێم بە نانی كوردان ، بە ئۆتۆمبێلی ئێمە ، بە پاسەوانی كوڕگەلی كوردان بەرەو هەواری خۆیانمان ناردنەوە ! تۆ بڵێی نانی كورد هێنده بێ خوێیە ؟!
چۆن (ام دحام) لە هزری خۆماندا بسڕمەوە كە لە گەرمەی جەبەرووتی بەعسدا لەبەر دەرگای ماڵەوەی ده‌یگووت :
ما مات ما مات البطل برزان
فوگ أرزچ یكردستان میت ألف برزان
ئه‌وانه‌ی سه‌ره‌وه نموونه جوانه‌كه‌ی نێوان كوردو خه‌ڵكی شیعه بوون كه‌چی ئێستا به‌داخه‌وه هه‌موو كوردستان به‌ده‌ستی سیاسه‌تی دڕندانه‌و نامرۆڤانه‌ی ئه‌وانه كه‌وتوینه‌ته گیانه‌ڵلایێ ، بۆیه پێویسته براگه‌وره‌كانی كورد پێداچوونه‌وه‌یه‌ك بۆ هێنده ساڵه‌ی هاوپه‌یمانیمان ده‌گه‌ڵ ئه‌وانه بكه‌ن بۆ ئه‌وه‌ی ئه‌و باره خواره راست بكرێته‌وه !