بەرژەوەندیی کوردایەتیی ئێمە و گەمەی سیاسیی ئێوە

هەولێر

ڕێککەوتنی حکوومەتی هەرێم و حکوومەتی فیدراڵ بۆ فرۆشتنی نەوت لە ڕێگەی کۆمپانیای سۆمۆ، دەبێ بە سەرکەوتنێکی دیبلۆماسی-سیاسی لە قەڵەم بدرێت؛ ئاخر ئەگەر جاران سۆمۆ بەبێ ئەوەی تاکە کوردێک لە دەستەی بەڕێوەبەرایەتییەکەیدا بەشدار بووبێت، هەوڵی دەدا نەوتی کوردستانی بە پەنامەکی و بێ حساب و کیتاب بفرۆشێت، ئێستە بە گوێرەی ڕێککەوتنەکە، جێگری یەکەمی کۆمپانیای سۆمۆ کوردە و حکوومەتی هەرێم لە هەموو وردەکارییەکانی فرۆشی نەوت ئاگەدار دەبێت و داهاتەكەی لە بانكێکدا لە ژێر چاودێری و كۆنترۆڵی حكوومەتی كوردستاندا دەبێت، ئەمە دەستكەوتێكی گەورەی خەڵكی كوردستانە.
جاران، ئەگەر فرۆشتنی نەوتی كوردستان لە دەرەوەی کۆمپانیای سۆمۆ، هەرزانتر و پڕ کێشەتر بووبێت، ئێستە ئیتر بە هەمان نرخی نەوتی عێراق دەفرۆشرێت و هیچ کەس و لایەنێک ناتوانێت تانەی لێ بدات.
نەوتی کوردستان لەوەتەی دۆزراوەتەوە، لە لایەن نەیارانەوە دژایەتی كراوە، بە چاوی تەماح و دوژمنكارانە تەماشاكراوە؛ ئەگەر ئێستە بەپێی ڕێککەوتن و دەستووری پەسەندکراوی وڵات، لەسەر بنەمای بەرژەوەندیی هاوبەشی “هەولێر ـــ بەغدا ” بکرێت بە مایەی بەرزبوونەوەی ئاستی خۆشگوزەرانی خەڵك و پێشكەوتنی زیاتری هەرێمی كوردستان، بۆ دەبێ دژایەتی و تەفسیری هەڵە و بانگەشەی خاپێنەری بۆ بکرێت؟!
ئایا لە دنیای سیاسەتدا، هەڵبژاردنی شێوازی پێکەوەکارکردن یان کێبەرکێ، پێوەری تێگەیشتن و شارەزایی سیاسی نییە؟
کاتێک تۆ بە بیری تەسكی حزبییانە ڕەفتار دەكەیت و بڕیار دەدەیت لە مەسئولییەت خۆت بدزیتەوە؛ تیمەكەت لە کاروباری حکوومەت لاتەریک دەكەیت و لەسەر بنەمای دژایەتیی کردنی هەر شتێک ئێمەی تێدا باڵادەست نەبین، سیاسەتی باوەش و ڕوومەتماچکردنی نەیارانی كورد دەگریتە بەر، دەبێ چاوەڕوانی ئەوەش ببیت کە بەرامبەرە هۆشیار و قاڵبووی سیاسەت و كارامەكەی ڕێگەی کوردایەتی، لە ئێوە مەزنتر بیربكاتەوە و بە هەنگاوی فراوان و گران، بەرەو ئاسۆی ڕوونی دەستكەوتی کوردایەتی هەنگاوی ژیرانە بنێ؛ دەبێ لەو ڕاستییەش بگەیت لەم مەیدانەدا، تۆی هەڵەشە و کاڵفامی سیاسی، جگە لە تەپ و تۆز، هیچی دیكەت بەرناکەوێت!