کۆمەڵگەی ڕەش و سپی !
هاودەنگ فارووق
چەند ساڵێكە ڕووناكبیران و پسپۆڕانی كۆمەڵناسی و زمان،
لە زۆر ڕەهەندەوە وشەی جێندەریان بە ڕوونی لێك داوەتەوە، كەچی ئیسلامی سیاسیی توندڕۆ لە كوردستان، ئایینیان كردووەتە چەكی بەربەرەكانێی هەموو پێشكەوتنێكی مرۆیی و دەیانەوێ كوردستان بەرەو شێوازی حکوومەتی تاڵیبان و هزری داعیشزم ببەن.
دنیای مۆدێڕن بۆ هەر دیاردەیەكی كۆمەڵایەتی، ڕێگە چارەی
زانستی و قانوونیی شیاو دەدۆزێتەوە بەشێوەیەك، كە كۆمەڵگە بە سرووشتیی خۆی ڕەوتی پێشكەوتنەكانی ببڕێت.
بێگومان لەم سەردەمەدا پێوەری دانانی هەموو قانوونێکیش، دەستەبەرکردنی ماف و ئازادیی مرۆڤە و مرۆڤ تێیدا بناغە و سەنتەرە.
كورد لەم بەشەی كوردستاندا كێشەی گەورەتری هەیە،
بەڵام بەشێک لە ئیسلامی سیاسیی دەیانەوێت بابەتی جێندەر بكەنە بەردەبازی پەڕینەوە لە شكست وئەو مایەپووچییەی کە لە سیاسەت وهەڵبژاردنەکاندا تێیکەوتوون.
ئیسلامی سیاسیی لەبری خۆ سەرقاڵكردن بە پرۆژەی
گەورەتر و خزمەتکردنی مرۆڤی کورد، هەر جارە و بە بیانوویەکی بەتاڵ،كێشە و تەنگەڵانێكی فیكری بۆ خەڵك قوت دەکەنەوە وەک ئەوەی وەکیلی خوای پەروەردگار بن،كۆمەڵگە بۆ ڕەش و سپی، بێدین و ئیماندار دابەش دەکەن! لەكاتێكدا ئەو جۆرە تێڕوانین و ڕەفتار و سیاسەتە دوور و نزیك، پەیوەندی بە ئایینەوە نییە.
ئایینی ئیسلام، هەرگیز داوای نەكردووە كۆمەڵگە بۆ ڕەش و
سپی دابەش بكرێت. خۆ ئەگەر وەك ڕەوتێكی سیاسیش سەرنج بدەین، لەبەرژەوەندی هیچ حزبێکی سیاسیشدا نییە نیوەی كۆمەڵگە بكاتە ڕكەبەری خۆی! كەچی ئیسلامی سیاسی نە گوێ بە لۆژیكە ئاینییەكە و نەگوێ بە بەرژەوەندی سیاسیش دەدات و سووک و هاسان نیوەی كۆمەڵگە دەخاتە خانەی دوژمنان و کافرانەوە! چونكە هەر لە بنەمادا، ئەوان جیاوازیی بیر و باوەڕ بە دوژمن و ناحەزی خۆیان لە قەڵەم دەدەن.
ئیسلامی سیاسیی كوردی، لە مەعدەنێكی سەیر و سەمەرە
دروستبووە، بۆیە هیچ خەمی دۆزی نەتەوە و لێکترازانی کۆمەڵگەکەیان نییە؛ لەكاتێكدا هەموو ڕەوتە ئیسلامییەكانی میللەتانی دی، هەڵگری خەمی نەتەوەو نیشتمانەکەیانن و لەهەوڵی دروستكردنی دەوڵەت و قەوارەدان بۆ نەتەوەكەیان.
بەڵام ئەم ئیسلام سیاسییەی کوردستان، نەك خەمی
نەبوونی دەوڵەتی کوردی ناخوات، بەڵکو لە ئاست بوون و بەردەوامیی ئەم هەرێمەشدا، نائارام و ناساز و تووڕەیە.
ئیسلامی سیاسیی کوردستان دەبێ لەو واقیعە بگات، کە
دابەشكردنی كۆمەڵگەی كوردی لەسەر پرسێكی وەكو جێندەر، بەشێكە لەهەوڵەكانی تێكدانی ئاشتی و ئاسایش و پێكەوە ژیانی كۆمەڵگە، هێڵی سووری بەرژەوەندیی نەتەوایەتی و نیشتمانی کوردە و بەزاندنی ئەو هێڵەش، مانای لە ناوچوونی گشت خەون و ئاواتەکانی گەلەکەمانە.
هەر کار و کردەوەیەکی نەگونجاو لەگەڵ داب و نەریتی
کۆمەڵایەتی، دەبێت تەنها لە ڕێگەی قانوون و چوارچێوەی بەرژەوەندیی نەتەوایەتیدا مامەڵەی لەگەڵ بکرێت، نەک بە هەڵوێستی نابەرپرسانەی كەسانێك.
ئیسلامی سیاسی لە وڵاتانی دیکە شەڕ بۆ مان و
گەشەپێدانی نەتەوەكەیان دەكەن، کەچی ئەوانەی ئێمە شەڕ بۆ وێرانکردن و لەناوبردنی کورددا دەكەن.. ئەگەر نا، دابەشكردنی كۆمەڵگە لەسەر بنەمای بۆچوونی ڕووكەش و یاریکردن بە عاتیفەی خەڵکانی سادە ، لەبەرژەوەندی كێدایە؟ ئاخر قسەكردن لەهەموو بوارێك و دانانی جێپەنجە لەسەر هەموو كایەیەك ئەگەر بەهەزاران میلیش لێیانەوە دووربێت، چ سوودێكی بۆ كورد و كۆمەڵگەی كوردی و خودی ئایینی ئیسلامیشی تێدایە؟