زەنگی بە خۆداچوونە‌وە!
بێستون ساڵەیــــی
هەموو هەڕەشەیەک دەکرێ زەنگ و دەرفەتێک بێت بۆ بەخۆداچوونەوە و ئاوڕدانەوە لە کەموکورتی و گرفتەکان. ناکرێت دەستەوەستان دانیشین و تەنها لە ئیدانەکردن و بەیاننامەی چەند خاڵیدا خۆمان قەتیس بدەین، ناکرێت هەمیشە لە چاوەڕوانی ئەوەشدا بین دوو دەوڵەت یاخود دوو کەسایەتی بیانی ئیدانەی دەستدرێژی و هەڕەشەکان بکەن، خاڵێکی بەهێز بۆ ئێمە قۆستنەوەی دەرفەتەکانە بۆ بەخۆداچوونەوە و ڕێکخستنی ناو ماڵمان.
لە مێژووی کورددا دوژمنەکانی هەمیشە لە دەرفەتێکدا گەڕاون بۆ
ئازارگەیاندن و زەبر وەشاندن، پەلاماردان و هێرشەکانیان زۆر جار کاریگەری خۆی هەبووە و تا سەر ئیسقان ئازاری پێ گەیاندووین، دوژمن بێ رەحمانە و کوێرانە تۆپ و ناپاڵم و موشەک و کیماو ژەهری خەردەلی بەسەردا باراندووین، بۆ ئازار گەیاندنمان هەرگیز ڕەچاوی کوردی ئەم پارچە و ئەو پارچەی کوردستانیان نەکردووە. کورد لە هەر پارچەیەک بە مەرام و ئاواتی خۆی بگات بۆ دوژمنانمان
یەک خەم و یەک پرسە، لە کوێ کورد بە بۆن و تام و چێژی ئازادی بگات دوژمنان ئۆقرەیان لێ دەبڕێت و بە پاساوی جۆربەجۆر دەکەونە دژایەتیکردن و ترس و تۆقاندنمان.
ئێمەی کورد بە هەڕەشە و زەبرو زەنگی دوژمنانمان نامۆ نین، هەزاران ساڵە کورد لە زنجیرە چیاکانی زاگرۆس بوونی هەیە و یەکێکە لە میڵەتە کۆن و رەسەنەکانی ئەم ناوچە جوگرافیاییە، خاوەنی دەسەڵات و پێگەی بەهێزی کۆمەڵایەتی و دەوڵەتداری و سەربازی بووە، بەڵام بەداخەوە هەمیشە لە لایەن گەلانی دیکەی ناوچەکە و دەوڵەتانی دیکەی دەوروبەری هێرشمان کراوەتە سەر و لە قۆناغی جیاوازیشدا بێ بەزەییانە هەوڵی لەناوبردنمان و سڕینەوەیان داوین. دوژمن لە شاخەکان و دەشتەکان، لە شار و گوندەکان لە هێرشەکانی
خۆی نەوەستاوە و لە هەر هێرشێکدا لە ژێر ئایەتی قورئاندا سەدان چەکی جۆراوجۆر و چەندین گازو ژەهری کوشندە و قەدەغەکراویان بەسەردا تاقی کردووینەتەوە، بەڵام لەو هەموو کارەسات و ڕووداوە مێژووییانەی خۆ دەبێت فێری وانە بووبین! سەرباری ئەم هەموو ستەم و زۆردارییەی سەرمان ئاخۆ کام وانە و کام پەند و ئامۆژگاریمان وەرگرتووە؟
ئێمە پێویستیمان بە ئامۆژگاری و وانە وەرگرتن هەیە. خۆ کارەساتەکان، تراژیدییەکان بایی هێندە هەن وانەیان لێ وەرگرین، ڕووداوە یەک لە دوا یەکەکانی سەدە هێندە کاریگەر و ناخ هەژێن و ماڵوێرانن کاتیەتی بتوانین بەخۆدا چوونەوەی ناو ماڵی خۆمان و پێداچوونەوە بە سیاسەتی خۆماندا بکەین.
کورد لایەنی کەم دەبێ دەستبەرداری سۆزو لاواندنەوە و دروشمی هەستیاری سۆزداریانە بێت، ناکرێت بە درێژایی مێژوو هەرچەند هەڕەشەمان لەسەر بوو بێت بە زمانی لاواندنەوە و سۆزەوە وەڵام بدەینەوە، بە پێچەوانەوە ئێمە خاوەنی ئیرادە و غیرەت و روحیەتی قارەمانانەین بیروباوەڕی پتەومان بە دۆزەکەمان هەیە.
هەموو ئەو کارەساتانەی لە ڕابردوو بە سەر ئێمەی کورددا هاتوون
و لە ئێستاشدا کە ستراتیج و پیلانی دوژمنان لە بەرامبەرمان کارایە و هەمیشە بۆ هێرش و پەلاماردانمان بەدوای دەرفەتی گونجاودان، هەموو ئەمانە پێمان دەڵێن کورد پێویستە ناو ماڵی خۆی ڕێک بخات، ڕێزەکانی پتەو ڕۆڵەکانی بە کوردایەتی و خۆشەویستی بۆ نیشتیمان گۆش بکات و پەروەردەیان بکات، فێری وانەی ڕۆژانی تەنگانە و هاوکاری و هەمدڵی یەکتر بین، لە ڕووداوەکاندا پشت لەیەکتر نەکەین و نەبین بە چاوساغی ئەم دوژمن و ئەو دوژمن، فێری ئەو وانەیە ببین کە بە هێزبوون لە یەکدەنگی و یەکگرتووییدایە، بە نەوەکان بگوترێ پەرتەوازەیی و لێکترازان ئازارمان دەدات و لاوازمان دەکات. کاتێک دوژمنانی ئێمە شەرم لە بەهاکانی مرۆڤایەتی و هاوسێیەتی و ئاینی و ئەخلاقی ناکەنەوە، ئەرکی ئەخلاقی و هاوزمانی و یەک نەتەوییمان دەبێت وامان لێ بکات لەگەڵ یەکتردا تەبا و براو هاوخەم بین.