پارتی و گرنگیدان ب ئافرەتێ
رێژین نهێلی
پارتی وەكو پارتەكا كوردستانی و دیموكرات هەر ژ دامەزراندنا خوە گرنگی دایە هەموو تەخ و چینێن جڤاكێ كوردستانێ، پارتی وەكو پارتێن دی یێن كوردی تنێ ل سەر بنەمایێ گرنگیدان ب پێكهاتەكێ یان ژی چینەكێ نەهاتیە ئاڤاكرن، ژ بەر هندێ ژی هەر پشتی شەش سالان ژ دامەزراندنا پارتی ب فەرمانا بارزانیێ نەمر ئێكەتیا ئافرەتێن كوردستانێ هاتە دامەزراندن، ژ وێ رۆژێ هەتا نها ژی رۆلێ ئافرەتێ هەم د ناڤ پارتیێ و هەم ژی د كارێن دی یێن جڤاكی دا رۆژ ب رۆژێ ل كوردستانێ زێدەتر لێ هاتیە.
پارتی مافێ ئافرەتێ و گەشەپێدانا كەسایەتیا وێ و رۆلێ ئافرەتێ د شورەشێ و پاشی ژی د رێڤەبرنا جڤاكێ كوردستانێ دا وەكو خالەك ستراتیژی دایە بەر چاڤان و هەردەم گرنگی ب هندێ دایە كو ئافرەتا كورد بشێت شیانێن خوە د بیاڤێن سیاسی، جڤاكی، ئابووری و ب تایبەتی ژی رێڤەبەریێ دا پێش بخینیت، هەكە ئەم بەرێ خوە بدەینێ پشتی سالا ١٩٩١ هەتا نها رۆژ ب رۆژێ پارتی پتر گرنگی دایە ئافرەتا كورد و بزاڤ كریە كو ئافرەت هەردەم هەست ب بەرپرسیاریا خوە بكەت و پێگەهێ خوە د ناڤ جڤاكی دا پێش بخینیت.
د كابینێن ئێك ل دووڤ ئێك یێن حوكمەتا هەرێما كوردستانێ دا پتر گرنگی ب ئافرەتێ هاتیە دان، نها ل هەرێما كوردستانێ ب پشتەڤانیا حوكمەتا هەرێما كوردستانێ كو تێدا پارتی هێزا سەرەكی یە، ب سەدان سازی و دەزگەهێن جڤاكی و رەوشەنبیری هاتینە دامەزراندن كو تێدا ئافرەتا كورد شیایە پتر جهێ خوە ببینیت و تێدا كار بكەت، گەلەك ئافرەت نها ئەندامێن سەركردایەتیێ یێ پارتی نە و ل پەرلەمانێ كوردستانێ ژی رێژەیەكا گەلەك باش یا ئافرەتان هەنە.
دشێین بێژین هەر ژ دامەزراندنا پارتی دیموكراتی كوردستان هەتا نها پارتی ئافرەت وەكو پشكەك سەرەكی ژ خەباتا خوە بۆ ئازادیا كوردستانێ دیتیە و چو دەمەكێ مرۆڤ نەشێت رۆلێ ئافرەتا كورد ژی پشتگوه بهاڤێژیت، د شەری دا، د شۆرەشێ دا و نها ژی د قۆناغا ئاڤەدانی و سەركردایەتیێ دا ئافرەتا كورد هەبوونا خوە سەلماندیە و رۆلێ وێ رۆژ ب رۆژێ پتر بەرچاڤ دبیت.
هەكە ئەم نها بەرێ خوە بدەینە جڤاكێن رۆژهەلاتا ناڤین دشێین ب وێرەكی دیار بكەین كو ژ بەر سیاسەتا حەكیمانە یا سەرۆك بارزانی و گرنگیا كو پارتی دایە ئافرەتێ ئەڤرۆكە ئاستێ ئافرەتا كورد و پێگەهێ وێ ل گەلەك وەلاتێن دی باشترە، ئەڤرۆكە ئافرەتا كورد شەری بۆ هندێ دكەت دا بشێت پتر خوە بگەهینتە وان تشتێن كو دڤێت، دڤێت باش بزانین كو ئاستێ پێشكەفتنا هەر جڤاكەكێ گرێدای پێشكەفتنا ئاستێ ئافرەتێ یە، پارتی دیموكراتی كوردستان ب دروستاهی ل سەر ڤێ خالێ كار كریە و زێدەباری دژبەریا گەلەك ئالیان ژی پارتی ل سەر ڤێ خالێ بەردەوام بوویە و ئافرەت ئەڤرۆكە ستونێ سەرەكی یێ پێشڤەبرنا جڤاكێ كوردستانێ یە.
بێگومان د هەموو جڤاكێن مرۆڤاتیێ دا كێماسی ژی هەنە، لێ كێماسی رامانا هندێ نادەن كو چ نەهاتیە كرن، نها ژی دهێتە خواستن كو ئێكەتیا ئافرەتێن كوردستانێ و ژنێن دی یێن سەركردە و رێڤەبەر ئێدی هەست ب بەرپرسیاریا خوە یا دیرۆكی ل هەمبەر جڤاكێ كوردستانێ ب تایبەتی ژی ل هەرێما كوردستانێ بكەن و رۆژ ب رۆژێ پتر كار بۆ چارەسەركرنا ئاریشێن خێزانی بكەن، نابیت ئافرەت چاڤەرێ هندێ بیت كو دێ زەلام ئاریشێن وێ چارەسەر كەت، د چارچۆڤێ بەرنامێ پارتی دا گەلەك ماف بۆ ئافرەتێ هاتیە دان و نها ل سەر ئافرەتا كورد ل هەرێما كوردستانێ مایە كا دێ چاوا شێت د قۆناغا نها دا پتر خزمەتا خوە و جڤاكی بكەت.