سالار عوسمان
کەسایەتییەکان
خوێندنەوە و هەڵسەنگاندن
(عەزیز گەردی وەک نموونە)
(عەزیز گەردی) لە نێوان دوورەپەریزیی و ئەفراندندا
(گەردی) یەکێکە لە ئایکۆنەکانی کتێبخانەی کوردی، دەتوانم بڵێم لە بواری وەرگێڕاندا، کەبوارێکی هەرە زیندووی شارســـتانی و کەلتوورییە، لووتکەیە، چونکە، یەک: خودان زمانێکی پاراو و ڕوون و ڕەوانی کوردییە و لە زمانەکانی تریشدا ناقۆڵا و ورد و شارەزایە، دوو: ئەو بەرهەمانەی وەریگێڕاون دانسقە و گرنگن، سێ: زۆریی ژمارەی کارە وەرگێڕەکانی مایەی سەرسوڕمانە، لەبەر ئەو ســـێ هۆکارە چۆنیی و چەندییە، ( عەزیز گەردی ) بە لووتکەی وەرگێڕانی کوردی دەزانم و، ئەو لە کاتێکیشـــدا دەستی بۆ سنعەتی پڕ لە هونەری وەرگێڕان برد، زۆربەی هاوڕێ نووسەر و ڕۆشنبیرەکانی دەستیان لە نێو قژی شیعر و پەرچەمی چیرۆک بوو، لێ ئەو دەیزانی میللەتی خاک داگیرکراوی پێڕانەگەیشـــتوو چەند حەوجە بە وەرگێڕانە، چەند حەوجە بەوەیە بە دونیا و ئەفراندنەکانـــی دونیـــا ڕابگات، بۆیە هەموو ژیانی بۆ ئەوە تەرخان کرد، کە خوێنەری کەمدیتەی کورد بە زۆردیتەییەکانی دونیا ئاشنا بکات، ئەو دەیزانی پەڕینەوەی مەعریفی بۆ گەلی دەرگا بەسەرداخراویی بن دەستی ستەم چەندە گرنگە، بۆیە دەستی بۆ وەرگێڕان برد، کە پەڕینەوەیەکی مەعریفییە، ئەو دەیزانی زمان بوون و ناســـنامەیە، بۆیە لەم کێڵگە گرنگانەوە کاری کرد و بە هۆشمەندیی و ئاگاییەوە هەوڵ و بەرهەمەکانی کردە کەڵەکەیەک، کە هی ئەوەیە نەوەکان پشتی پێ بدەن و نەترسن لە کەوتن !.. ئاخر کتێب، بەرهەم، هونەر و وەرگێڕانی تریشمان هەن، ڕزیو، لەرزیو و داتەپیو، هی پشت پێداکردن نین، نەوەکان دەبەنە
سەر لەڕیی و لێوار و کەوتن، بۆیە (عەزیز گەردی) لەو بوارەدا تا کەشکەڵان بڵندە و مایەی شانازییە.
دوورەپەرێزیی، ڕێگایەک بۆ ئەفراندن؟..
قسەکردنی ڕاستەخۆ لە بارەی کەسایەتییە کەلتوورییەکان پێویستە، پێشتر هەندێ وردە قسەمان لەو بارەیەوە کردووە، کورد لە قسەلێکردن و هەڵسەنگاندنی ڕاستەوخۆی کەسایەتییە کەلتوورییەکان خۆی دەدزێتەوە، بەشێکی ئەو خۆدزینەوەیە نابوێرییە، بەشـــێکی ترســـە لە دڵشکانی ئەوانی تر، بەشـــێکی تری نابەرپرسیەتییە، هەمووی بەســـەریەکەوە نازانستییە، ناکرێ قسە لە کەســـایەتییە کەلتوورییەکان نەکەین، بەڵام بەو مەرجەی زانســـتییانە و بابەتییانە بێت، دەی، ئیتر کوردە و لە تەک خاسیەتە
باشەکانی، خاسیەتگەلێکی خراپیشی هەس و ئەوەیش بەشێکە لە سروشت و جۆری تێگەیشتنی میللەتان!.. (عەزیز گەردی) کەسایەتییەکی دوورەپەرێزی، ناکۆمەڵایەتی، دڕدۆنگ و ناتەبا بوو لەگەڵ نزیک و هاوڕێ و دۆستەکانی، تەنانەت لەگەڵ ئەوانەیش، کە (عەزیز) یان وەک چاوی خۆیان خۆش دەویست، خۆ ئەگەر چیرۆکی زوویربوونەکانی پرۆفیسۆر و دکتۆر و مامۆســـتا و وەرگێـــڕ و توێژەر و ئازیزمان (عەزیز گەردی) لەگەڵ نزیک و بـــرادەر و هاوڕێ ئەزیزەکانی کۆبکەینەوە، کتێبێک دەردەچێ، قەبە، ســـەیر و ســـەرنجڕاکێش و دڵنیام فرۆشییەکەیشی پێوانە دەشـــکێنێ!.. لێ کورد ئەوەی نەکردووە و نایکات، باش یا خراپ، من پێموایە هەموو شـــتێ هی قســـەلێکردنە، بەو مەرجەی زانستییانە و نیازپاکانە و بۆ بەرچاوڕوونیی نەوەکان و
پەروەردەکردنیان بێت بە ئاراستەی دروستدا. گەردی و تووڕەییەکانی، گەردی و گومانەکانی، گەردی و ڕووشـــکێنییەکانی، گەردی و تەنیاییەکەی، گەردی و ســـادەییەکەی، گەردی و خاکەڕاییەکەی، گەردی و ڕەبەنییەکەی، گەردی و یەکڕیتمییەکەی، گەردی و نوێنەبوونەوەی، گەردی و سەفەرنەکردنی، گـــەردی و خۆدوورگرتنـــی لە سیاســـەت، گەردی و لێبوونەوەی بـــرادەرە ئەزیزەکانی، گەردی و ژن و بێ عیشـــقی، گەردی و بەشدارینەکردنی لە چالاکییەکان، گەردی و قسە نەگوتراوەکانی، فرمێسکە وشکەکانی، خەمە وەدەنگ نەهاتووەکانی، هەنگاو و گڕ و گریان و گەورەییە شارەوەکانی،.. هەموو ئەمانە و پتریش هی ئەوەن قسەیان لەبارەوە بکرێت، لێیان بکۆڵدرێتەوە، لایەنە ئەرێنی و نەرێنییەکانیان ڕوون بکرێتەوە، تا نەوەکان بەڕوونی کەسایەتیی (عەزیز گەردی) بناسن!.. لە کۆتاییدا دەمەوێت بڵێم: عەزیز گەردی – ی مامۆستام، کە من نە زۆر لێی نزیک بووم و نەدوور، نە تووڕە بوو لێم و نە بەین و پێوەندیمان پچڕا، بەگەورەیی چۆتە نێو مێژووی ڕۆشنبیریی کوردییەوە، دەپرسین: ئایا دوورەپەرێزیی و خەسڵەتەکانی بەرەو
گەورەیی و ئەفراندنی برد؟!.. ئایا نەدەکرا دوورەپەرێز نەبێ و داهێنەریش بێ؟!.