بیرەوەریا کۆچۆ

دلڤین خەلەف

ل ٢٠١٤/٨/١٥ ژ ئەنجامێ هێرشەکا دڕندانە بۆ سەر گوندێ کۆچۆ ژلایێ تیرۆرستێن داعشێ قەلەرەشکێن بیابانا ڤە ب هەزاران ژ خەلکێ گوندێ کۆچۆ و دەڤەرێن دی یێن شنگالێ ب دەستێن وان یێن قرێژ هاتنە کوشتن وگرتن ومالێن وان تالان و وێران کرن و ژسەر جهـ و وارێن خۆ دەربەدەربوون.
دڤێ هێرشێ دە تیرۆرستان ب هزاران کچ و ژنێن ئێزدی ب دارێ زۆرێ رەڤاندن و لبازارێ کرین و فرۆتن بوان دکرن وەکو هەر کەل وپەلەکی بێ بها وئەڤە ژی جارا بەریە ل سەرانسەری جیهانێ رووبدەت و ئەڤ جۆرێ سەرەدەریێ دگەل مرۆڤان بێتە کرن و بڤێ رەنگی ئافرەت بێتە تەپەسەر کرن وئێشاندن .
گرتن ورەڤاندنا ئافرتێن ئێزدی ل کۆچۆ دیاردەکا جەرگ برە وگونەهباریەکا مەزنە هەستێ هەر کەسەکی خودان وژدان لسەر روویێ ڤێ ئەردێ هژاند ومانا وان هەتا نهۆ دناڤ دەستێن هۆڤ ونەمەردان دە شەرمەزاریەکا هەتکبەرە بۆ هەر مرۆڤەکی خودان کەرامەت، دوربوون وڤەشارتنا ژ همبێزا کەسەکارێن وان پووچەلکرنا یاسایێن ناڤدەولەتیە وبنپێکرنا دادپەروەریێ یە.
بوونە ھەشت سالێن سەرانسەر ئافرەتێن شنگالی د بێ سەروشوین ودناڤ گرتیگەهێن تیرۆرستان دە وەکو ئێخسیر ماین، سەرەرای رزگارکرنا گەلەکا ژوان برێکا نڤیسینگەها تایبەت یا سەرۆکێ هەرێما کوردستانێ بەرێز نێچیرڤان بارزانی، لێ دیسان هژمارەکا مەزن ماینە گرتی، لەوما ئەم داخوازێ ژ هەموو لایەنێن پەیوەندیدار و نەتەوەیێن ئێکگرتی و ئێکەتیا ئەوروپی و حکومەتێن عیراق وکوردستانێ دکەین ب هەموو رێکا هەول بدەن ئەوێن ماینە دناڤ دەستێن تیرۆرستان دە ژی رزگاربکەن و بگەهیننە کەسوکارێن وان، هیڤیا ژیانەکا ب سەربلندی بۆ خەلکێ کۆچۆ بگشتی دکەین وسەرەخۆشیێ ل کەسوکارێن قوربانیا دکەین وهەڤپشکیێ ددەرد وخەمێن دایک و خوشکێن خۆراگر دکەین هەر سەر بەرز و سەربلند بن هەموو ئافرەتێن شنگالێ و کوردستانێ.