ھاوڕێ یە‌كگرتووە‌كانم، سپێدە دە‌كە‌نە تۆپخانە؟
مەشخەڵ كەوڵۆسی
چەند ساڵێكە ڕەوتی ئیسلامی كوردستانیش، وەك هەر ڕەوت و گروپێكی تری فیكری و ئیتنیكی دابەشبوون بەسەر چەند بەرەیەكدا، هەندێكیان لەو پرۆسەیەدا كەوتوونەتە بەرەی نەیارەكانی كوردستانەوە، بەئاشكرا و بێ هیچ جۆرە پەردەیەك دژایەتی ڕوونی هەموو شتێكی كوردستان دەكەن و، لەوەشدا ڕەنگە خۆیان پێیان وابێت، دژایەتی دەستەڵات دەكەن.
ئیستا قسەی ئێمە لەسەر ئەو ڕەوتە نیە، چونكە پێم وایە ئەو هاندەر و
فاكتەرە خودی و بابەتییانەی ئەو ئیسلامییانەی خستۆتە بەرەی دژبەرانی نەتەوەی كوردەوە، قووڵتر و فراوانتریشن لەوەی بتوانین لەوتارێكی كورتی هەفتەییدا تاوتوێیان بكەین. بەڵكو قسەكەی من ڕێك و ڕەوان لەسەر برایانمانە لە”یەكگرتووی ئیسلامی كوردستان”.
دیارە یەكگرتووی ئیسلامی كوردستان، دەستێكی سپی هەبووە لە ناو مێژووی ئەم سیی ساڵەی ڕابردووی خەڵكی كوردستاندا، ئەوان توانیویانە لەڕێی پرۆژەكانی خزمەتگوزارییەوە، لە نەوەدەكانی سەدەی ڕابردوووەوە، پەیامی سپی خۆیان پیشانی هەموو لایەك بدەن. ئەوە ڕاستییەكە كە هیچكاممان ئەگەر بمانەوێت ڕێز لە مێژووی نوسینی خۆمان بدەین، ناتوانین نكولی لێ بكەین، تەنانەت ئەگەر نكولیش بكەین، هیچ لەمەسەلەكە و قورسایی خزمەتەكانی ئەوان كەمناكاتەوە.
لە ڕیفراندۆمی پڕشكۆی خەڵكی كوردستانیشدا، هاوڕێكانمان لەیەكگرتووی ئیسلامی، بەگەواهی یار و نەیار، نەخشی زێڕینیان هەبوو، خودی ئەمینداری گشتی یەكگرتوو، چركە بەچركە لەپشتیوانی ئەو پرۆسەیە درێغی نەكرد، ئەوەش بۆ ئیستا و بۆ نەوەكانی داهاتووشمان، پێویستە بەڕوونی باسبكرێت. بەڵام ئەوەی جێگەی ئاماژەیە و، بەندە بە مەترسیشی دەزانم لەسەر مێژووی یەكگرتوو، لەسەر سیاسەت و خیتابی یەكگرتوو، ئەوەیە ماوەیەكە چەند كارەكتەرێكی سیاسی و جاروباریش میدیاكارەكان و كەناڵەكانیان، دووچاری جۆرێك لەتێكەڵبوون لەگەڵ گوتاری پۆپۆلیزم دەبن. تەنانەت تەقلیدی ئەو حیزبانە دەكەن كە هیچیان لەو گوتارە پۆپۆلیستییە نەچنیەوەو، بەرەو پوكانەوە چوون. بۆیە ئەوانەی كە بڕیار دەدەن لەهەنگاوەكانی یەكگرتوو، ئەوانەی كە لەپشتی خزانی یەكگرتووەوەن بەرەو چاڵە تاریكەكانی پۆپۆلیزم، بەرلەوەی دژی كوردستان بن، دژی خودی یەكگرتوون، چونكە هەمووان دەزانین ئەزمونی حیزبە پۆپۆلیستەكان، تەنها پوكانەوەبوو، تاوای لێهات ئیستا كورسیەك یان دوو كورسی پەرلەمان دێنن، چاوەڕوانیش دەكرێت لەداهاتوودا، بەتەواوی بچوك ببنەوەو نەتوانن بگەنە پەرلەمان. بۆیە دەپرسم:
ئایا لەبەرژەوەندی یەكگرتوودایە بەو ڕێگایەدا بڕوات؟.
ما وەیەكە چەند پەرلەمانتارێك، بەم دواییانەش میدیای یەكگرتوو،
لەكەلتوری باوی یەكگرتوو بەرەو پۆپۆلیزم و دژایەتی بەهاكانی نەتەوەو نیشتمان لایانداوە، بەداخەوە لە دوا نمایشدا، كەناڵی “سپێدە” كەسێك بەناوی شاعیر دێنێتە سەر شاشەو، توانا مادی و تەكنیكییەكانی كەناڵەكەی دەخاتە بەردەست، ئەویش هەرچی وشە ناشیرنە بەرانبەر نیشتمان و بەهاكانی بەكاری دێنێت.
من وەكو میدیاكارێك و نوسەرێك، تاڕادەیەكیش توێژەرێك، قەت لەوە
ناگەم سودی ئەو بادانەوەیە بۆ بۆ سیاسەت و گوتار و، بۆمێژووی یەكگرتوو چیە؟ لەكاتێكدا هەموو ئەوانەی نیشتمانیان كردە كاڵایەك بۆ ڕكابەری سیاسی لەگەڵ دەستەڵاتدارانی هەرێمدا، سەرجەمیان پووكانەوە!.
یەكگرتوو بۆچی تازە بەتازە دێتە نێو ئەو قوڕو لیتەیە، كە هیچ لێی نایەت و، دەبێت دڵسۆزانی خەباتی سپی یەكگرتوو، جڵەوی ئەو حەزەی چەند كادرێكیان بگرن. یەكگرتوو هەروەك خۆی جوانە، نەك تەقلیدی پۆپۆلیزم بكات. نیشتمان، نەتەوە، ئاڵا، ڕیفراندۆم و خەونی سەربەخۆیی، موڵكی هەموومانە، چۆن یەكگرتوو هەموو ئەو بەهایانە لەخۆی دوور دەخاتەوە. من بم لەجێی بڕیاردەرانی یەكگرتوو، هەر ئیستا بەڕێوەبەرێتی سپێدە ناچار دەكەم، داوای لێبوردن لەمێژووی یەكگرتوو، لەهەستی گەلی كوردستانیش بكات، كە من یەكێكم لەو گەلەو، هەرگیز چاوەڕوانم نەكردوە سپێدە خۆی بكاتە تۆپخانە و سوكایەتی بە بەهاكانم بكات. ئەوە لەیەكگرتوو نایەت و لێی
چاوەڕوان ناكرێت.