لێسانەوەی چەقۆی قەساب
هاودەنگ فاروق
هەموو تاكێكی ئەم نیشتمانە مافی خۆیەتی بەرەنگاری گەندەڵی ببێتەوە و، هەوڵ بۆ چاكسازی بدات و ببێتە پشتیوانی ئەو دەست و هێزەی لە نێو كایەی حكومڕانێتی كوردستاندا، خوازیاری چاكسازییە بۆ ئەوەی ڕەگوڕیشەی گەندەڵی بۆ تاهەتایە ببڕێتەوە. بەڵام ئەو كەســـەی كە تەنیا لەبەر ئەوەی دەســـتی بۆ گەندەڵی ئاوەڵا نییە، هاوار دەكات بچێتەوە بن سێبەروباوەشـــی حكوومەتی ناوەند، جیا لە خۆمەكەمزان و لەدەستدانی ئیرادە، چ پێناسەیەكی دیكە دەیگرێتەوە؟
لە بیرەوەرییە تاڵ و تاریكەکەی ئەنفالكرانی ١٨۲هەزار ڕۆڵەی کورددا، کەسانێک جا بە هەر مەرامێک بێت، هەوڵ دەدەن، ئەم ساڵیادانە تێك بدرێن و نەكرێنەوە، بێبەها بكرێن و شـــكۆی ئەو مەرگەســـاتە نیشتمانییە لە زەین و بیروهۆشی كۆمەڵگەی كوردی بسڕێتەوە، كار دەكەن بۆ ئەوەی خەڵكی كوردستان غەزەب لەخۆی بگرێت و خەنجەر لە پشتی خۆی بسوێ.
ئەوانەی داوای ڕادەستكردنی سەروەت و سەروەریی كوردستان بەو دەوڵەتە دەكەن، كە ٨۰ ساڵ بە سەرمایە و نەوتی كوردستان، كوردی كیمیاباران و زیندەبەچاڵ كردووە؛ بابایەكی خۆبەكەمزان وداشۆراون لە فكری نەتەوایەتی و نیشتمانپەروەری.
لێسانەوەی چەقۆی قەساب، خۆكردنە كەواسووری بەر لەشكر بۆ تەسلیمكردنەوەی كورد و وزەو توانستەكانی بە بەغدا، ئەو بەغدایەی كە ئێستا لە هەموو كاتێک زیاتر نوقمی نائارامی و گەندەڵی و وێرانكارییە، لەكوێ داخوازییەكانی خەڵكی سەربەرزی كوردستان بەدی دێنێت؟!
ئاخر لەكوێ خەڵك حزب و كەسانێكی ڕاسپاردووە و شەرعیەتی پێ داون كە کوردستان بكەنەوە بە ژێردەستە؟ ئەو ئێراقەی كە ۳٤ ساڵ دوای تاوانی ئەنفال، ئێســـتاش نەک داوای لێبوردن و قەرەبوو، بەڵكو بە جینۆســـایدی بڕینی مووچە و بوودجەی خەڵكی كوردستان، دەستی خستۆتە بینەقاقای یەك بە یەكی خەڵكی كوردستان. شـــەرعیەتی ئەم داوایە لەكوێوە دێت كە بێ ئەوەی پرس بە خەڵكەكەی بكرێت، كۆمەڵە حزب و كەســـانێك تەنها لەبەر كۆنەقین و ڕقی شەخســـی، دەیانەوێت سەروەت و سامانی نەتەوەیەك بخەنەوە ژێردەستی بەغدا؟ لەكوێی دنیا و لە نێو چ قەومێكدا نموونەی لەم شێوەیە هەیە، لەكام قۆناغی مێژوودا دیتراوە؟ نوخبەیەكی سیاسی، بێباكانە پێش تیغی سەر ملی میڵەتەكەی خۆی بكەوێ؟
ئەوانەی هانی كورد دەدەن بۆ تەســـلیمبوونەوە و خۆچەماندن، لە ڕاســـتیدا قیبلەنماكەیان لە كورد دزیوە، تاكو كەشـــتییەكەی سەرگەردان بێت و نەگاتە ئامانج. ئەوان لەباتی ئەوەی بەرچاوی كورد ڕوون بكەنەوە بۆ گەیشتن بە ئامانجی مەزنتر و ژیانێكی شایستە، بە پێچەوانەوە هانی دەدەن و كار دەكەن بۆ ئەوەی بچێتەوە نێو قەفەزی داگیركەران، ئایا هیچ ژیانێكی بەكەرامەت و سەربەرزانە لەناو قەفەزی دیلێتیدا هەیە؟