دیاردا كوشتنا ئافرەتێ
دلڤین خەلەف
وەکو دیار ل ڤی سەردەمی پێشکەفتی دا خەلکێ کوردستانێ بگشتی بەرەو قوناغەکا نوو یا برێڤەبرنا ژیانێ برێکەفتیە وگەهشتیە باوەریەکا مەزن کو بتنێ ب زانین وزانست وئافاکرنا کەسایەتیەکا سەرکەفتی وهزرو بیرەکی باقژ ئەڤ کاروانە وەکو هەموو گەلێن پێشکەفتی کو دگەهنە ماف وئارمانجێن خوە یێن سەرەکی وپێش هەر تشتەکی دڤێ خوە وەکو مرۆڤەکی ژیرمەند بدەتە دیارکرن. بێگومان هەر مڵەتەکی دابونەریت وكەلەپۆرێ خوە یێ تایبەت هەیە ودناڤ دا باشی وخرابی هەنە لێ دیسان ژی شانازیەکا مەزن پێدبەن ودگەل به ۆرینا دەم وچاخان هندەک ژوان دابونەریتا دهێتە ژبیرکرن وهندوکێن دن ژێ وندادبن وجڤاک ژی هندەکان ژێ پشتگوهڤە دهێلێ ژبەر کو دگەل سەردەمی ناگونجن وبەلکو زۆر جاران کێشە وئاریشە ژێ پڵیدا دبن، لەوما گەلێ کورد ژی سەرەرای ئەوێ زولم زۆرداریا لێ هاتیە کرن لسەر دەستێ داگیرکەران ل درێژیا دیرۆکێ پێگیری ب چاند وکەلەتۆر وکەلەپۆرێ خوە یێ کەڤنار ودێرین کریە ودگەل دا ژیایە وهەردەم شانازی پێ کریە وپێ سەربلند وکەیف خۆشبوویە، وهەروەسا گەلەک ژ دابونەریتێن کەڤنار ونەشایستەی کۆمەلگەها کوردەواری ژی پاشخۆڤە هێلاینە وهزر دجڤاکەکی مەدەنی سەردەم دە کریە وبهیڤیا گەهشتنا ئاستەکی پێشکەفتی وبلند ژبۆ نفشێن پاشەرۆژێ کرینە.
لەوما بمخابنی ڤە بابەتێ کوشتنا کەچ وژنان وئێش وئازارێن وان ل ڤی سەردەمێ پێشکەفتی دا بوویە دیاردەکا مەترسی دار ل دەمەکی کو ئافرەتا کورد ژی گەهشتیە وێ قوناغێ ئەڤرۆ ئاستێ وێ یێ رەوشەنبیری وتێگەهشتنا وێ دبوارێ دابونەریتێن جڤاکی دا نە کێمترە ژ ئاستێ زەلامێ کورد وفەرە کۆمەلگەها مە ڤێ چەندێ ب هوری ل
بەرچاڤ بگرێ ورۆلێ ئافرەتا کورد د هەموو بوارێن ژیانێ دە گرنگ ب نرخێ وهزر د وەک هەڤیا دناڤبەرا ژن ومێران دا بکەن وئەڤێ دیاردا خراب ژناڤ جڤاکا کوردەواری یا مرۆڤ دۆست وئاشتی خواز بنبر بکەن ونەهێلن ژڤێ چەندێ زێدەتر ئافرەتا کورد بێتە ئێشاندن وهەستێ وێ بێتە شکاندن وژشیانێن وێ بێتە خوار وزیان بێبکەڤێ، هیڤیدارین ژ دامو دەزگەهێن حکومەتا هەرێمێ ئەڤ بابەتە بێتە چارەسەرکرن وسزایێن دژوار دەرهەقێ ئەوان کەسان بێتە وەرگرتن کو دبنە ئەگرێ ڤێ دیاردەیا نەشارستانی وبجدی هەولێن وێ چەندێ بێنە کرن ئافرەتا کورد ژی ببتە بەشەکی کاریگەر ژ ژیانا گەلێ مە وهەموو دەما ژیانا وێ ژی بێتە پاراستن ل ژێر سیبەرا یاسایێ وچاڤدێریا حکومەتا وەلاتێ مە دا ئەڤە وسەروەری بۆ ئافرەتا کورد ل هەر جیهەکی وکوردستان هەر ئارام وئاڤەدانبێ.