ئاسیا لوقمان شاکر
ڕۆڵێ ئافرەتان د ناڤ کار و چالاکییان دا، ب تایبەت ل وان کۆمەلگەهێن زۆر ڕۆڵی نادەنە ئافرەتان، کێم دیارە. لێ دەما ئافرەتەک دهێتە د ناڤ کار و چالاکییان دا، دڤێت قوربانییێ بدەت و پشتەڤان هەبن؛ چونکی ل ناڤ ڤان کۆمەلگەهان ئاخفتن زۆر کارتێکرنێ ل سەر دەروونێ وان دکەن و زوو دەست ژ کاران بەرددەن، چونکی کۆمەلگەهی زۆر ڕۆڵ نەدایێ کو باوەری ب خوە هەبیت د وی بواری دا. د ڤێ ڕاپۆرتێ دا (هێلین میدیا) بۆچوونا چەندین لایەنێن جودا وەرگرتییە ل سەر ئەگەرێن ڤێ چەندێ دا کو چارەسەرییەکێ بۆ ببینن.
دونیا مەسعوود، وەک ئافرەتەکا چالاک کو پشکداریێ د کار و چالاکییان دا دکەت، بۆ (هێلین میدیا) دبێژیت: “ئافرەتێ زۆر ڕۆڵ هەیە، لێ کۆمەلگەها مە ژبەر کو کۆمەلگەهەکا عەشایەرییە، زۆر ڕێکان نادەتە ئافرەتێ د ناڤ کار و چالاکییان دا. لێ یا سەرنجا من ڕاکێشای، ئافرەتێن کۆمەلگەها مە زۆربەیان حەزا کار و چالاکییێن سیاسی هەیە و دڤێن د وی بواری دا دەرکەڤن. سال بۆ سال ڕێژەیا ئافرەتان یا زێدە بووی د کار و چالاکییێن سیاسی و ناڤ جڤاتێن سیاسی دا. ل سالێن ١٩٩٨ێ دا ڕێژەیا پشکدارییێ نێزیکی ١١.٨٪ بوو، پاشان بەرەڤ زێدەبوونێ چوو و گەهشتە ١٧.٨٪ ل سالا ٢٠٠٨ێ، و ل دوماهییێ ل سالا ٢٠١٨ێ گەهشتە ٢٣.٥٪. پشکدارییا سیاسی یا ژنان زێدە بوو و نوکە ئەم یێ دبینین د مەیدانا سیاسی و د کار و چالاکییان دا ئافرەت و زەلام بووینە مل ب ملێ ئێك، ژبۆ بەرفەرهکرنا کاری.”
گووڤان نەوزاد (چالاکڤان و میدیاکار)
بۆ (هێلین میدیا) دبێژیت: “ئافرەتێ ڕۆڵ د هەمی کاران دا هەیە، نە ب تنێ د کار و چالاکییان دا، چونکی ئافرەت نیڤا کۆمەلگەهێیە. لێ د کۆمەلگەهێ مە دا ئەز دبینم تەکنۆلۆژیایێ کارتێکرن هەبوویە کو نەشێت خوە د هەمی کار و چالاکییان دا ببینیت. ئافرەت د کار و چالاکییان دا وردتر و ژیرترە ل چاڤ زەلامی، ژبەر هندێ دەما چالاکییەکا ئافرەتان بیت، ب ڕەنگەکێ جوانتر لێ دهێت. کاتێ کارەک یان چالاکییەک ژ لایێ هندەک جهان ڤە دهێتە سازکرن و ئافرەت تێدا پشکدار بیت، ئەو کار و چالاکی زەنگینتر دبیت. لێ وەک من ل دەستپێکێ گۆتی، ئافرەتا مە یا چاڤترسیایە بهێتە د مەیدانا کار و چالاکییان دا ژبەر تۆرێن جڤاکی؛ ب تایبەت د نوکە دا کو ژیریێ دەستکرد پێنگاڤێن مەزن دهاڤێژیت. لەورا دڤێت ئەم گەنج و لاو پشتەڤانێن ئافرەتان بین و وێ ترسی بشکێنین و هۆشیارییێ بۆ وان بەلاڤ بکەین دا کو پتر باوەری ب خوە هەبیت.”
دوماهی:
وەک جەنابێ سەرۆکی دبێژیت: “ئافرەت نیڤا کۆمەلگەهێیە و تەمامکەرا کۆمەلگەهێیە.” ئافرەت وەک وی تابلۆیێ بێ ڕەنگە، هەتا کار و چالاکییەکێ دا ئافرەت پشکدار نەبیت، ڕەنگێ وێ دیار نابیت. پێدڤییە ئەم هەمی پێکڤە ب ئێك دەست پشتەڤانییا ئافرەتێ بکەین، ب تایبەت ل وان کۆمەلگەهێن ڕێگر بن، دا ئافرەت ژی ڕۆڵێ خوە دیار بکەت.