وەزارەتی ناوخۆی حكوومەتی هەرێمی كوردستان بڕیاری لێخۆشبوونی بۆ هەموو ئەو كەسانە دەركرد كە سزای دواكەوتنی گرێبەستی ئەلیكترۆنیی كڕین و فرۆشتنی ئۆتۆمبێلیان لەسەرە، بڕیارەكە سبەی پێنجشەممە دەكەوێتە بواری جێبەجێكردن و تا سەری ساڵی نوێ بەردەوام دەبێت.
بەڕێوەبەرایتی هاتوچۆی هەولێر بڵاوی كردەوە “لە هەوڵێکی تری وەزارەتی ناوخۆ و لەپێناو بەرژەوەندیی هاووڵاتییان، بڕیاری لێخۆشبوون بۆ سزای دواکەوتنی گرێبەستی ئەلیکترۆنی دەرچوو”.
راشیگەیاند “بەشێکی زۆری هاووڵاتییان دوای ئەوەی گرێبەستی ئەلیکترۆنیان ئەنجام دابوو، بەڵام دوای کۆتاییهاتنی ماوەی گرێبەستەکە کە 60 ڕۆژە ، مامەڵەی گواستنەوەی خاوەندارێتیەکەیان ئەنجام نەدابوو و ئەمەش ببووە هۆکاری ئەوەی سزای دارایی دواکەوتنەکەیان بکەوێتە ئەستۆ” .
هاتوچۆی هەولێر جەختیشی كردەوە كە بەهۆی ئەم بڕیارەی وەزارەتی ناوخۆ، سەرجەم ئەو كەسانەی ئەم كێشەیەیان هەیە لە سزاكەی دەبەخشرێن .
ئاماژەی بەوەش دا كە ئەم بڕیارە سبەی پێنجشەممە رێكەوتی 18/12/2025 دەکەوێتە بواری جێبەجێکردن و لە 31/12/2025 کۆتایی دێت