بەڕێوەبەرایەتی حەج و عومڕەی کوردستان ڕایگەیاند: دەسەڵاتدارانی سعوودیە بڕیاریان داوە سنورێک بۆ دیاردەی وێنەگرتن لە نێو شوێنە پیرۆزەکان دابنێن.
ئەمڕۆ شەممە، کاروان ستونی، گوتەبێژی فەرمی حەج و عومڕەی کوردستان، لە لێدوانێکدا پشتڕاستی کردەوە کە بەپێی بڕیارێکی وەزارەتی ناوخۆی سعوودیە، لە وەرزی حەجی ساڵی 2026 ـەوە، تۆمارکردنی وێنە و ڤیدیۆ لە هەردوو مزگەوتی پیرۆزی پێغەمبەر (د.خ) لە مەدینە و حەرەمی مەککە بە هەموو شێوەیەک قەدەغە دەکرێت.
بە گوتەی کاروان ستونی، ئامانج لەم هەنگاوە:
1. ڕەخساندنی کەشێکی ئیمانی و دوورخستنەوەی حاجیانە لە سەرقاڵبوون بە مۆبایلەوە.
2. خزمەتکردنی زیاتری حاجیان و نەهێشتنی جەنجاڵی.
لەلایەکی دیکەوە، گوتەبێژەکەی حەج و عومڕەی کوردستان پشتیوانی خۆی بۆ بڕیارەکە دەربڕی و گوتی: “ئەمە لە بەرژەوەندی حاجیانە، ئێمە وەک هەمیشە هەوڵ دەدەین حاجیانی کورد نموونەیی بن و پابەندی تەواوی ڕێنماییە نوێیەکان بن.”