فەرماندەی زێرەڤانی روونكردنەوە لەبارەی چاوپێكەوتنی پێشمەرگەیەك لەگەڵ كەناڵێكی راگەیاندن بڵاو دەكاتەوە، تێیدا جەخت دەكاتەوە كە پێویستە بۆ بەدەستهێنانی ڤیو و بینەری زیاتر، ئیستغلالی ئازار و بەرائەتی پێشمەرگە نەكەن.
ئەمەی خوارەوە دەقی روونكردنەوەكەی فەرماندەیی زێرەڤانییە
كەناڵی رووداو چاوپێکەوتنێکی لەگەڵ پێشمەرگەیەک بەناوی (عەدنان زوهێر) کردووە کە برینداری شەڕی داعشە و نابەرپرسیارانە و بەبێ مۆڵەتی خۆی چەند گرتەیەکی ڤیدیۆیی لێ بڵاو کردۆتەوە.
ئەوە لە کاتێکدایە کە ئەو پێشمەرگەیە نەخۆشی هەبووە و ڕووداو بەداخەوە ڕەچاوی دۆخی نەخۆشییەکەی نەکردووە، لەبڕی ئەوەی پەیوەندی بە لایەنی پەیوەندیدار بکات تەنیا لەبەر وروژاندنی خەڵک و بەدەستهێنانی ڤیوی زیاتر، ئیستغلالی ئازارەکانی ئەو پێشمەرگەیەی کردووە.
دوای بڵاوبوونەوەی ئەو بابەتە لەلایەن رووداوەوە، فەرماندەیی زێرەڤانی هەڵسا بە بەدواداچوون بۆ ئەم بابەتە و دواجاریش دەرکەوت كە لایەنە پەیوەندیدارەکان هەر لەسەرەتای برینداربوونی ئەو پێشمەرگە قارەمانە بۆ چاکبوونەوەی یارمەتییان داوە و هاوکاری کراوە و بە بەردەوامی ڕەچاوی دۆخی تەندروستی و ژیانی کراوە، هەروەها بە بڕیاری لیژنەی پزیشکی، وەزارەتی پێشمەرگە خانەنشینی کردووە.
پێویستە راگەیاندنەکان بەرپرسیارانە مامەڵە بکەن و بە هیچ شێوەیەک بۆ سەبقی خەبەری و ڤیوی زیاتر ئیستغلالی ئازار و بەرائەتی پێشمەرگە و خەڵکی کوردستان نەکەن.
راگەیاندنی فەرماندەیی زێرەڤانی