بە بڕیاری سەرۆكی حكوومەتی هەرێمی كوردستان، زەوی بەسەر فەرمانبەرانی شارۆچكەی مەخموور و هەریەك لە شارەدێكانی كەندێناوە و مەلاقەرە و گوێڕ و قەراج و ناوچەكانی دیكە دابەش دەكرێت.
زیرەك حەسەن بەڕێوەبەری شارەوانییەكانی شارۆچكەی مەخموور تایبەت بە (كوردستان تیڤی) راگەیاند: بەبڕیاری مەسرور بارزانی سەرۆكی حكوومەتی هەرێمی كوردستان، زەوی بەسەر فەرمانبەرانی مەخموور و كەندێناوە و مەلاقەرە و گوێڕ و قەراج دابەش دەكرێت.
راشیگەیاند: هەر فەرمانبەرێكی ئەو ناوچانە پارچە زەوییەكیان لە باشترین شوێن پێ دەدرێت، زەوییەكەش لە سەنتەری شارۆچكەی مەخموور دەبێت.
هەروەها رایگەیاند: ئەم بڕیارەی سەرۆكی حكوومەت لە ڕێگەی وەزارەتی شارەوانی و شارەوانییەكانی شارۆچكەی مەخموور كاری جێبەجێكردنی بۆ ئەنجام دەدرێت.
زیرەك حەسەن گوتیشی: ئامانج لەم بڕیارەی سەرۆكی حكوومەت، هەنگاونانە بۆ دروستكردنی چەند گەڕەكێكی نوێ لە سەنتەری شارۆچكەی مەخموور و هەروەها گەیاندنی خزمەتگوزاری و ئاوەدانكردنەوەیان.
بەڕێوەبەری شارەوانییەكانی شارۆچكەی مەخموور جەختیشی كردەوە كە فەرمانبەرانی سنووری شارۆچكەی مەخموور، هاوشێوەی فەرمانبەرانی هەرێمی كوردستان سوودمەند دەبن لە پڕۆسەی وەرگرتنی زەوی.