ئەمڕۆ شەممە 2ـی ئابی 2025، بەڕێوەبەرایەتیی ئاسایشی هەولێر، لە ڕاگەیێندراوێکدا ئاشکرای کرد کە بە فەرمانی دادوەری لێکۆڵینەوەی ئاسایش، هێزەکانیان توانیویانە سێ تۆمەتبار بە ناوەکانی (ق. أ. ع)، (م. غ. س) و (ف. ف. ج) دەستگیر بکەن.
سەبارەت بە شێوازی کارکردنی باندەکە، ئاسایشی هەولێر ڕوونی کردووەتەوە کە تۆمەتباران شوقەیەکیان لە یەکێک لە پڕۆژەکانی نیشتەجێبوونی شاری هەولێر بەکرێ گرتووە و کامێرایەکی نهێنی بچووکیان لەناو ئامێرێکی بڵندگۆ (سپیکەر) لە ژووری نووستنی شوقەکەدا جێگیر کردووە.
بەپێی ڕاگێیەندراوەکە، باندەکە بە بیانووی میوانداری و بەکارهێنانی چەند ئافرەتێک بۆ سەرنجڕاکێشان، زیاتر لە 10 هاووڵاتییان بردووەتە شوقەکەیان و بە نهێنی وێنە و ڤیدیۆی نەشیاویان تۆمار کردوون.
لە بەشێکی دیکەی ڕاگەیێندراوەکەدا هاتووە، دوای تۆمارکردنی گرتە ڤیدیۆییەکان، تۆمەتباران هەڕەشەی بڵاوکردنەوەیان لە قوربانییەکان کردووە و لە بەرامبەر بڵاونەکردنەوەیدا، داوای بڕێکی زۆری پارەیان لێ کردوون.
بەڕێوەبەرایەتیی ئاسایشی هەولێر سوپاسی ئەو هاووڵاتیانە دەکات کە هاوکار بوون لە پێدانی زانیاری بۆ دەستگیرکردنی ئەم باندە و جەخت دەکاتەوە کە تۆمەتباران ڕووبەڕووی یاسا دەکرێنەوە.