دوێنێ، ئومێد خۆشناو، پارێزگاری هەولێر، لە دیوانی پارێزگا، پێشوازیی لە شاندێکی دامەزراوەی بینینی جیهانی، بە سەرۆکایەتی نەمیر جبووری کرد.
لە دیدارەکەدا، کە هەریەک لە د.شوان ئیسماعیل، بەڕێوەبەری نەخۆشخانەی چاوی فێرکاری هەولێر و ناز جەلال، بەڕێوەبەری قەیرانەکانی پارێزگا ئامادەی بوو، شاندی میوان تیشکیان خستەسەر کار و بەرنامەکانیان وەک دامەزراوەیەکی خێرخوازی و ئاماژەیان بەوەدا کە بڕیاریانداوە لە هەولێری پایتەخت بە هەمانگی پارێزگای هەولێر و لە ڕیگەی بەڕیوەبەرایەتی گشتیی تەندروستی هەولێر، لە نەخۆشخانەی چاوی فێرکاری هەولێر، (٤هەزار پشکنینی چاو ) و (٤٠٠ نەشتەرگەری ئاوی سپی و زێدە گۆشتی چاوو ) بە خواڕایی بۆ خەڵکی کەم دەرامەت و هەژارانی شاری هەولێر لە ڕێگەی پزیشک و پسپۆرانی دامەزراوەکەیان ئەنجدامبدەن.
لەلایەن خۆیەوە، پارێزگاری هەولێر، وێرای دەستخۆشی لە دامەزراوەی ناوبرا، ئامادەیی هەموو ئاسانکارییەکی پارێزگای نیشاندان و دووپاتی کردەوە، ئەوەی لە بەرژەوەندی خەڵکی شارەکەمان و هەژاران و کەمدەرامەتان دابێت، بە هەموو شێوەیەک پاڵپشت و هەماهەنگین، هەرچی پێویستیش بێت بۆ سەرخستنی کارەکەتان ئامادەین پێشکەشتان بکەین.