ئه‌مڕۆ یەکشەممە 1/6/2025، ساسان عه‌ونی، وه‌زیری شاره‌وانی و گه‌شتوگوزار له‌گه‌ڵ وەزیری گواستنەوە و گەیاندن، ئانۆ جەوهەر عەبدۆکا كۆبووه‌وه كه بەیاوەری شاندێك له ئەثیل مەقدیسی، بەرپرسی لێژنەی ناوچەی عەنکاوەی پارتی دیموکراتی کوردستان و ئاری غەریب کاکە، سەرۆکی شارەوانیی عەنکاوە و زیاد سەلمان حوسێنی، بەرپرسی کۆمەڵەی کشتوکاڵی مار عۆدا و نوێنەر و خاوەن قەرەبووی زەوییەکانی ئیبارشیەی کلدانی لە هەولێر و هاووڵاتییانی لە خاوەن زەوی لە توێژینەوەی کشتوکاڵی و خاوەن زەوی بەپێی لیستی زیندانیانی سیاسی، سەردانی وەزیری شارەوانی و گەشتوگوزاریان كرد. شانده‌كه له‌گه‌ڵ ئومێد خۆشناو، پارێزگاری هه‌ولێریش كۆبوونه‌وه.
ساسان عەونی، وه‌زیری شاره‌وانی و گه‌شتوگوزار و ئومێد خۆشناو، پارێزگاری هەولێر بۆ بەدواداچوونیان بۆ جێبەجێکردنی بڕیارە مێژووییەکانی سەرۆکوەزیران رێزدار مەسرور بارزانی، سەبارەت بە عەنکاوە و هاووڵاتییانی سنووره‌كه سەبارەت بە ژماره‌یه‌ك بابه‌ت و ته‌وه‌ر كرد. له‌وانه:
1- قەرەبووکردنەوەی جووتیارانی عەنکاوە و زەوییەکانی ئیبارشیەی کلدانی هەولێر بۆ زەوییەکانی مەعەسکەری سوپای ڕژێمی پێشووی عێراق.
2- قەرەبووکردنەوەی زەویوزاری هاووڵاتییان و یەکلاکردنەوەی زەوییەکانی 390ی فایلی توێژینەوەی کشتوکاڵی.
3- تەرخانکردنی زەوی بۆ زیندانیانی سیاسی لە عەنکاوە.
4-دەرکردنی ڕەزامەندی کۆتایی بۆ دەستپێکردنی پڕۆژەی نیشتەجێکردنی گەنجانی بێث حەدیاب.
5- بەدواداچوون بۆ تەمویلی پڕۆژەی باخچەکانی بابل لە عەنکاوە.
6- دەرکردنی ڕێنمایی نوێ بۆ ڕێکخستنی دامەزراوە بازرگانی و گەشتیارییەکان.
7-پشتیوانیکردنی کۆنفرانسی تایبەت بۆ پێشخستنی شاری عەنکاوە.
لەمیانه‌ی هەردوو کۆبوونەوەکەدا باس لە ڕێکارەکانی جێبەجێکردنی کۆتایی بۆ ئەو بڕیارانەی سەرەوە کرا كه گەیشتوونەتە قۆناغی کۆتایی دوای هەوڵە بەرفراوانەکان کە زیاتر لە سێ ساڵ و نیو لە کارکردنی ماندوونەناسانە لەلایەن لیژنەیەکی تایبەتەوە كاری له‌سه‌ر كراوه.
بەپێی بڕیارێکی ئەنجومەنی وەزیران، ئەم هەوڵانە بە بڕیارێک گەیشتە قۆناغی کۆتایی، کۆتایی بە کەیسێک هێنرا کە زیاتر لە پەنجا ساڵی خایاندووە، ئه‌وه‌ش دوای رەزامەندی ڕێزدار مەسرور بارزانی سەرۆکوەزیرانی هەرێمی کوردستان بۆ پەسەندکردنی ڕاسپاردەکانی ئەو لیژنە تایبەتەی بۆ ئەو مەبەستە پێکیهێنابوو.
شایەنی باسە، پڕۆژەی کۆمەڵگەی نیشتەجێبوونی بێث حەدیاب پڕۆژەیەکی نیشتەجێبوونە و تایبەتە بە گەنجانی مەسیحی و پێکهاتووە لە ٧٢٠ شوقە بە هەموو خزمەتگوزاری و شوێنی سەوزایی دەورەدراوە. ئامانجەکەی دابینکردنی پێداویستییەکانی نیشتەجێبوونی دانیشتووانی شارەکە و بەدەستهێنانی سەقامگیری کۆمەڵگا و بەرزکردنەوەی مانەوەی گەنجانە لە شارەکەیاندا.
پڕۆژەی پارکی گاناثا دبابل (باخەکانی بابل) پارکێکی خێزانی گشتیی مۆدێرن، ڕووبەرەکەی زیاتر لە ١٠٠ هەزار مەتر چوارگۆشەیه، وەک دەرچەیەکی شارستانیی مۆدێرن بۆ خەڵکی عەنکاوه خزمەت دەکات و کارەکتەری کولتووری بەرجەستە دەکات کە لە میراتی کولتووری ناوچەکە ئیلهام وەرگیراوە. قەرەبووکردنەوەی جووتیارانی عەنکاوە و ئيبارشیەی کلدانی هەولێر بۆ زەوییەکانی کەمپی سەربازیی ڕژێمی پێشووی عێراق، قەرەبووکردنەوەی زەوییەکانی هاووڵاتیان لە موقاتەعەی 390ی توێژینەوەی کشتوکاڵی و تەرخانکردنی زەوی بۆ زیندانیانی سیاسی لە عەنکاوە، دەستکەوتی بەرچاون کە بە هەزاران خێزانی مەسیحی لە عەنکاوە و دەرەوەی وڵات ليی سوودمەند دەبن. جگە لەوەش دەرکردنی ڕێنمایی نوێ بۆ ڕێکخستنی دامەزراوە بازرگانی و گەشتیارییەکان و پاڵپشتیکردنی کۆنفرانسی تایبەت بۆ پەرەپێدانی عەنکاوە لەلایەن وەزارەتی شارەوانی و گه‌شتوگوزار و پارێزگاری هەولێره‌وه بە پاڵپشتی ڕاستەوخۆی حکوومەت، نوێنەرایەتیی بەشێک لە هەوڵە هەرە دیارەکان دەکەن بۆ پێشخستنی عەنکاوە وەک شارێکی مۆدێرن کە یەکێکە لە گەورەترین شارەکانی مەسیحییەکان لە کوردستان و عێراق و ڕۆژهەڵاتی ناوەڕاست.
ئەم بڕیارانه پابەندبوونی حکوومەتی هەرێمی کوردستان بە سه‌رۆكایه‌تیی ڕێزدار مەسرور بارزانی بە مافی پێکهاتە ئایینی و نەتەوەییەکان و بە پرەنسیپی هاوڵاتیبوون لە کوردستان دووپات دەکەنەوە.