شاندێکی یەکێتیی ئافرەتانی کوردستان بەسەرۆكایەتیی خاتوو زیبا تەها سكرتێری یەكێتیی ئافرەتان، سەردانی نووسینگەی سەرەکیی ڕۆژنامەی “هەولێر”یان کرد. ئەمە دووەم سەردانی فەرمیی ئەو ڕێکخراوەیە بۆ ڕۆژنامەی هەولێر لە ماوەی ئەمساڵدا.
مەبەستی سەرەکیی سەردانەکەی شاندی یەکێتیی ئافرەتان، دەربڕینی سوپاس و پێزانینی ڕێکخراوەکەیان بوو بەرانبەر بە ڕۆژنامەی “هەولێر”. شاندەکە دەستخۆشییان لە ستافی ڕۆژنامەکە کرد لە پای ئەو بایەخ و گرنگییە بەرچاوەی کە ڕۆژنامەی هەولێر بە بەردەوامی بە پرسەکانی ئافرەت بەگشتی و ئەو كۆنفرانسە گرنگەی ئافرەتانی كوردستانییان داوە، هەروا گرنگیدان بە چالاکییەکان و ڕۆڵی یەکێتیی ئافرەتان و بزووتنەوەی ژنان بە گشتی دەیدات.
ئەندامانی شاندەکە ئاماژەیان بەوە کرد کە ڕووماڵکردن و گرنگیپێدانی میدیایی ڕۆژنامەی هەولێر بە کاروباری ڕێکخراوەکەیان و تواناو قەڵەمی ئافرەتان، هۆکارێکی گرنگە بۆ گەیاندنی پەیام و ئامانجەکانیان بە کۆمەڵگە و هەروەها پشتیوانییەکە بۆ بەدیهێنانی مافەکانی ئافرەتان لە کوردستاندا. ئەوان جەختیان لەوە کردەوە کە ئەم سەردانە دووبارەیە لەم ساڵدا، نیشانەی پەیوەندیی پتەو و ڕێزی دوولایەنەی نێوان هەردوو لایەنە.
لەلایەن خۆیەوە، سەرنووسەرو ستافی ڕۆژنامەی “هەولێر” وێڕای بەخێرهێنانی گەرمی شاندی میوان، دووپاتیان کردەوە کە ڕۆژنامەکەیان بە ئەرکی سەرشانی خۆی دەزانێت کە مینبەرێکی ئازادو كارا بێت بۆ دەنگ و داواکارییەکانی سەرجەم چین و توێژەکانی کۆمەڵگە، بەتایبەتیش ئافرەتان کە ڕۆڵێکی سەرەکییان لە بونیادنان و پێشخستنی ژیان و كۆمەڵگەی كوردستاندا هەیە.
هەروەها ستافی ڕۆژنامەی هەولێر جەختیان لەوە کردەوە کە بە هەموو توانای پیشەیی و میدیایی خۆیانەوە، بەردەوام دەبن لە پشتگیریکردنی یەکێتیی ئافرەتان و سەرجەم ئەو هەوڵانەی کە لەپێناو بەهێزکردنی پێگەی ئافرەت و یەكسانی و داکۆکیکردن لە مافەکانیدا دەدرێن.
ئەم دیدار و دەربڕینی پێزانینە هاوبەشە وەک هەنگاوێکی ئەرێنی لەقەڵەمدەدرێت بۆ پتەوکردنی زیاتری پەیوەندی نێوان دامەزراوە میدیاییەکان و ڕێکخراوەکانی کۆمەڵی مەدەنی لەپێناو خزمەتکردنی دۆزی ڕەوای کۆمەڵگە و پێشخستنی هۆشیاریی گشتی.
لەلای خۆیەوە سەرنووسەری ڕۆژنامەی هەولێر بەڵێنی پێدان کە لە جاران بە گوڕتر بایەخ بە کار و چالاکیی ئافرەتان بدات و ڕۆژنامەی هەولێری وەک ماڵی مەعریفی ئافرەتان وەسف کرد.