لە ڕۆژی یەکشەممە ١٣ی نیسانی ٢٠٢٥ لە شاری هەولێر، یەکەمین کۆنفڕانسی ئافرەتانی کوردستان بەناونیشانی “بە تواناکانمان داهاتوو بنیات دەنێین” دەستی پێکرد. کۆنفڕانسەکە بە ئامادەبوون و چاودێری سەرۆک بارزانی و، ئامادەبوونی مەسرور بارزانی جێگری سەرۆکی پ.د.ک، بەرپرس و ئەندامانی دەستەی کارگێڕی و ئەندامانی مەکتەبی سیاسی و کۆمیتەی ناوەندی، بەشێک لە پەرلەمانتاران و وەزیرانی هەرێمی کوردستان و عێراق، هەروەها ژمارەیەکی بەرچاو لە ئافرەتانی کوردستان لە ناوخۆ و دەرەوەی کوردستان و تاراوگە بەڕێوەچوو.
کۆنفڕانسەکە بە دەقیقەیەک وەستان بۆ گیانی پاکی شەهیدان و سەروەرییان (بارزانیی نەمر و کاک ئیدریسی هەمیشە لە یاد) دەستی پێکرد، دواتر سروودی کۆنفڕانس لەلایەن لاوانی پەیمانگەی هونەرە جوانەکانی هەولێر پێشکەشکرا. بەشێکی گرنگی کۆنفڕانسەکە دۆکیۆمێنتاری “پارتی و ئافرەت، خەرمانێک لە باوەڕ و متمانە” بوو کە لەلایەن کەناڵی کورداتان تیڤییەوە ئامادەکرابوو تیشکی خستە سەر مێژووی پارتی دیموکراتی کوردستان لە گرنگیدان بە ڕۆڵی ئافرەت و هەروەها مێژووی ئافرەتانی شۆڕشگێڕی گەلی کورد.
ئامینا زکری، ئەندامی مەکتەبی سیاسی پ.د.ک و سەرپەرشتیاری گشتیی کۆنفڕانسەکە گوتاری بەخێرهاتنی پێشکەشکرد. پاشان سەرۆک بارزانی لە گوتارێکدا ئاماژەی بە ڕۆڵی ئافرەتان لە شۆڕشەکانی گەلی کورد و پەروەردەکردنی پێشمەرگە وەک دایک و مامۆستا کرد و جەختی لەوە کردەوە کە پێویستە ئافرەت لە هەموو بوارێکدا ڕۆڵی خۆی ببینێت. سەرۆک بارزانی کۆنفڕانسەکەی بە چالاکییەکی گرنگ لە قەڵەم دا و وتی: “ئێوە بە تواناکانتان داهاتوو بنیات بنێن و ئێمەش پشتیوانتانین.”
لە بەشێکی دیکەی کۆنفڕانسەکەدا، نمایشی پانۆڕامای ئافرەتانی کوردستان لەلایەن کۆمەڵێک کیژ و لاوی بەهرەداری تیپی کچانی دهۆک و شاریا پێشکەشکرا، کە گوزارشتی لە ماف و پێگە و کاریگەریی ئافرەتان لە کۆمەڵگە و نیشتماندا دەکردەوە.
کۆنفڕانسەکە سێ پانێڵی سەرەکی لەخۆ گرت: پانێڵی یەکەم لەسەر ستراتیژییەتی پارتی بۆ بەهێزترکردنی بەشداری ئافرەتان لە دامەزراوە دەستوورییەکانی هەرێمی کوردستان بوو؛ پانێڵی دووەم لەسەر ئافرەت لەنێو ئۆرگان و ڕێکخستنەکانی پارتیدا بوو؛ و پانێڵی سێیەم لەسەر ئافرەت و هەڵبژاردن بوو. کۆنفڕانسەکە ماوەی دوو ڕۆژی دەخایەنێت و ڕۆژی دووشەممە ١٤ی نیسانی ٢٠٢٥ بە چەند پانێڵ و بڕگەی دیکەوە بەردەوام دەبێت.