هیوا ئەحمەد مسته‌فا، بەرپرسی مەکتەبی ڕێکخستنی کەرکووک-گەرمیانی پارتی دیموکراتی کوردستان لە ڕێوڕەسمی کردنەوەی بارەگای مەکتەبی ڕێکخستنی کەرکووک-گەرمیانی پارتی گوتی، هاتووینەتەوە کەرکووک بۆ ئەوەی ببین بەشێک لە چارەسەری بۆ کێشەکان.
ئه‌مڕۆ شەممە 5ـی نیسانی 2025، هیوا ئەحمەد مسته‌فا، بەرپرسی مەکتەبی ڕێکخستنی کەرکووک-گەرمیانی پارتی دیموکراتی کوردستان لە ڕێوڕەسمی کردنەوەی مەکتەبی ڕێکخستنی کەرکووک-گەرمیانی پارتی گوتی، “ئەمڕۆ بە فەرمی گەڕانەوەی مەکتەبی ڕێکخستنی پارێزگای کەرکووک ڕادەگەیەنین، گوتیشی: “دوای هەشت ساڵ گەڕانەوەمان لە کاتێکدایە کە جیهان و ڕۆژهەڵاتی ناوەڕاست گۆڕانکاری گەورەیان بەخۆیەوە بینیووە و پێمان وایە گۆڕانکارییەکانیش بەردەوام دەبن.
هیوا ئەحمەد مسته‌فا، ئاماژەی بەوە کرد، “بارودۆخی ناوچەکە هەستیارە و پارتی دیموکراتی کوردستانیش درک بە هەستیاری و بەرپرسیارەتی بارودۆخەکە بەرامبەر خەڵکی کوردستان و عێراق دەکات. ئێستا یەکڕیزی گەلی کورد لە هەموو کاتێک گرنگترە.
بەرپرسی مەکتەبی ڕێکخستنی کەرکووک-گەرمیانی پارتی گوتیشی: “دەمانەوێت هەموومان بگەڕێینەوە بۆ دەستوور و کار بە دەستوور بکەین، ئێمە هاتووینەتەوە، لەگەڵ لایەنەکانی دیکە لە پارێزگای کەرکووک پێکەوە چارەسەری کێشەکان بکەین.
دوای تێپەڕینی نزیکەی هەشت ساڵ بەسەر ڕووداوەکانی 16ـی ئۆکتۆبەر، بارەگای مەکتەبی ڕێکخستنی پارێزگای کەرکووک-گەرمیانی پارتی کاتژمێر 11ـی پێش نیوەڕۆی ئەمڕۆ شەممە 5ـی نیسانی 2025 بە ئامادەبوونی بەرپرسانی باڵای پارتی، لە گەڕەکی عەرەفەی کەرکووک کرایەوە