ئەمڕۆ سێشەممە كەمال محەمەد ساڵح وەزیری کارەبا ڕایگەیاند: ئەو پارەیەی هاووڵاتییان بۆ پڕۆژەی ڕووناکی (کارەبای 24 کاتژمێری) دەیدەن کەمترە لەو نرخەی ئێستا دەیدەن بە کارەبای نیشتمانی و مۆلیدە بەیەکەوە.
ئاماژەی بەوەش کرد: پڕۆژەی رووناكی كارەبای 24 کاتژمێری بۆ هاووڵاتییانی كوردستان دابین دەكات، ئەم پڕۆژەیە خەونێك بوو كە چەندین ساڵە هاووڵاتییانی كوردستان چاوەڕوانی بوون.
وەزیری کارەبا گوتیشی: دڵنیایی دەدەین لە 90%ی هاووڵاتییان لە پڕۆژەی ڕووناكی پارەی زیاد نادەن، بۆیە پارەی پڕۆژەی ڕووناكی لە پارەی ئێستای موەلیدە كەمتر دەبێت، لەگەڵ ئەوەشدا دەنگی نابێت و ژینگەش پیس ناکات.
كەمال محەمەد دڵنیایشی دا لەوەی كە پڕۆژەی ڕووناکی لە بەرژەوەندی گشت هاووڵاتییانی کوردستان دەبێت، بۆیە پێویستە لەگەڵ ئەم پڕۆژەیە بین و پشتیوانی لێ بكەین.