سەنتەرێ ڤەکۆلینێن کوردی ل کۆلیژا زانستێن مرۆڤایەتی ل زانکۆیا زاخۆ دیار کر کو ب هەلکەفتا ڕۆژا زمانێ دایك ل ژێر درۆشمێ “زمانێ مە ڕوومەتا مەیە” ئەڤرۆ سەنتەرێ ڤەکۆلینێن کوردی چالاکیەك کر، ئو سێ پەرتووکێن نوو بۆ بهێزکرنا چاپۆکییا نڤیسین و داڕشتنێ ب زمانێ کوردی بەلاڤکرن.
سەنتەرێ ڤەکۆلینێن کوردی، ئاماژە ب وێ چەندێ ژی کر کو ئەڤ هەر سێ پەرتووکێن زمانی بناڤێن چاپۆکییا نڤیسینێ و بنەمایێن نڤیسینا داڕشتنێ و نڤیسینا پەڕەرافا ئەکادیمی ژ لایێ دکتۆر عەبدولسەلام نەجمەدین بەرپرسێ سەنتەری ڤە هاتینە نڤیسین، ئو دیزاینا هەر سێ پەرتووکان ژ لایێ وارهێل عەبدولباقی ڤە هاتیە کرن.
هەر بڤێ هەلکەفتێ د دوو ڕۆنشتنان دا بەحسێ ڕەوشا نووکە یا زمانێ کوردی ل باشوورێ کوردستانێ هاتە کرن ژ لایێ دکتۆر عەبدولوەهاب خالد ڤە، ئو دەم و تاف د زمانێ کوردی دا ژ لایێ دکتۆر باییز عومەر ڤە هاتە بەحس کرن، و ئەڤ هەر دوو ڕۆنشتنە ژ لایێ دکتۆر شۆڕەشڤان عادل هاتنە بڕێڤەبرن.