ئەمڕۆ چوارشەممە، 12-02-2025، لە پەراوێزی دووەم ڕۆژی کارەکانی لووتکەی جیهانیی حکوومەتەکان لە دوبەی، مەسرور بارزانی، سەرۆکی حکوومەتی هەرێمی کوردستان، هەڤپەیڤینی لەگەڵ کەناڵی (دوبەی تیڤی)ـی ئیماراتی کرد.
سەرۆک وەزیران مەسرور بارزانی لە هەڤپەیڤینەکەدا، باسی لە گرنگیی لووتکەکە، پەیوەندییەکانی نێوان هەرێمی کوردستان و ئیمارات، دەرفەتەکانی وەبەرهێنان لە هەرێمی کوردستان، بارودۆخی سیاسیی عێراق و ناوچەکە و چەندان پرسی دیکە کرد.
لە بارەی لووتکەکەوە، سەرۆک وەزیران مەسرور بارزانی گوتی: “لووتکەی جیهانی حکوومەتەکان سەکۆیەکی گرنگە بۆ بەشداریی سەرکردە و حکوومەتەکانی جیهان بە مەبەستی تاوتوێ و گفتوگۆکردن لەسەر ئەو پرس و بابەتانە کە بۆ دانیشتووان و گەلانی ناوچەکە مایەی نیگەرانی، یان جێگەی بایەخێکی زۆرن.”
سەرۆک وەزیرانی هەرێمی کوردستان هەروەها سوپاسی لە شێخ محەممەد بن زاید و شێخ محەممەد بن ڕاشدی کرد “بۆ ئەم دەستپێشخەرییەی بووەتە مایەی کۆکردنەوەی حکووتەکەکان و سەرۆکەکان بۆ ئەوەی لەسەر پرس و بابەتە گرنگەکان گفتوگۆ بکەن.”
سەرۆک وەزیران، لەم هەڤپەیڤینەدا باسی لە ئەزموونی هەرێمی کوردستان کرد و گوتی: ئێمە سوودمان لە ئەزموونی ئەو وڵاتانە وەرگرتووە کە هەمان ڕێچکەیان گرتووەتەبەر، لە نێویاندا ئیمارات، کە ئەزموونێکی باشی هەبووە لە چەند ساڵی ڕابردوودا، ئەمەش بۆ ئێمە بایەخێکی زۆری هەبووە بۆ ئەوەی بزانین چۆن بتوانین هەماهەنگ بین و بتوانین سوود لە دەرفەتەکان وەربگرین و لەگەڵ خاوەن بەرژەوەندییەکان گفتوگۆ بکەین و بگەینە ڕێککەوتن لەگەڵ ئەوانەی بەلایانەوە گرنگە و دەیانەوێت وەبەرهێنان لە کەرتەکانی پیشەسازیدا بکەن.”
مەسرور بارزانی دووپاتیشی کردەوە “ئەوەی ئێمە پێویستمان لە ماوەیەکی کورتدا جێبەجێ بکەین، ئەوەیە لەگەڵ سەرجەم سەرکردە سیاسییەکان و خاوەنکار و خاوەن کۆمپانیا و سەرجەم لایەنە پەیوەندییەکان ڕێک بکەوین و باشترین بیرۆکەکانی چارەسەر وەربگرین.”
لە بارەی پلانی بەکارهێنانی تەکنەلۆجیاکانی لە کاروباری حکوومەت، وەک وەزەی نوێ بووە و ژیری دەستکرد، مەسرور بارزانی گوتی: ئێمە کارمان کردووە بۆ ئەوەی ئابووری و وەبەرهێنانەکانمان هەمەچەشن بکەین، وزە یەکێکە لە سێکتەرەکان و لەسەر پەرەپێدانی وزەی نوێ بووەوەش لە هەرێمەکەمان مکوڕین، چونکە ناوچەکە پێویستی بە بڕێک وزە هەیە، جا کارەبا یان ئیدارەدانی سەرچاوەکانی ئاو بێت، یان چۆنێتیی بەکارهێنانی سەرچاوە دەگمە کانزاییەکانی ناوچەکە بێت.
سەرەڕای ئەمانە، کەرتەکانی دیکەش هەن لەوانە گەشتوگوزار یان بنیادنانەوەی ژێرخان، ئەمەش پێویستی بە بنیادنانەوەی ژێرخانی کەرتەکانی دیکە دەبێت، لەوانە ژێرخانی تەندروستی، پەروەردە و فێرکردن، ئەم بوارانە هەموویان پێویستییان بە وەبەرهێنان هەیە و هەوڵیشمانداوە لەم کەرتانە وەبەرهێنان بکەین.
سەرۆک وەزیران گوتیشی: لەم کەرت و بوارانەدا وەبەرهێنانمان کردووە و سەرکەوتنیشمان بە دەست هێناوە و بەردەوامیش دەبین، چونکە خواستمان لەسەر ئەوەیە لەم سەرکەوتنەی بە دەستمان هێناوە زیاتر بە دەست بێنین، بەڵام ئەوەی پەیوەندی بە تەکنەلۆجیاوە هەیە، ئەمەیان بابەتێکی دیکەیە و هەوڵمان داوە بە گوێرەی توانا لە کەرتی گشتی و تایبەتدا پەرەی پێ بدەین و دەشمانەوێت بۆ زیاتر پەرەپێدانی ئەم بوارە سوود لە ئەزموونی خەڵکی دیکە وەربگرین.
سەبارەت بە بەرەنگاربوونەوەی گۆڕانکارییەکانی کەشوهەوا، سەرۆک وەزیران گوتی: ئێمە لە هەرێمی کوردستان توانیومانە غازی بەهەدەر بوو وەربگرین و کارەبای لێ بەرهەم بهێنین. جیا لەمەش، زۆر بواری دیکە هەیە لەگەڵ کۆمپانیاکان کاریان لەسەر دەکەین بۆ ئەوەی دەرفەتی وەبەرهێنانیان تێدا بڕەخسێنین، هەروەها هەوڵمان داوە سوود لە وزەی خۆر و بەنداوەکان وەربگرین لە پاڵ پاراستنی ژینگە کارەبایان لێ بەرهەم بێنین و لە کەرتی کشتووکاڵدا سوودیان لێوەرگرین.
لە وەڵامی ئەوەی لە دەیەی داهاتوودا کوردستان چۆن دەبینت، سەرۆک وەزیران باسی لەوە کرد: من کوردستان وەها دەبینم کە ناوێکی نوێ دەبێت لەسەر نەخشەی وڵاتە پێشکەوتووەکان، بۆ ئەمەش پێویستیمان بە هاوکاری هەموو دۆستەکانمان هەیە بۆ ئەوەی سەرکەوتنی زیاتر بە دەست بهێنین، چونکە کوردستان شوێنێکی سەقامگیر و پارێزراوە بۆ هەموو ئەوانەی دەیانەوێت سەردانی بکەن، ئەمیش بەهۆی ئەو پێشکەوتن و سەقامگیرییەی هەیەتی، هەربۆیە ئومێد دەکەین لە ساڵانی داهاتوودا هەرێمی کوردستان لە ئاست و قۆناغێکی دیکە دا بێت.