دیدار: دلۆڤان هالۆ – زاخۆ
ڕۆمان خەلیل ڕەسۆل، هەلگرێ باوەرناما ماستەرێ ب یاسایێ و مامۆستایێ زانکۆیا زاخۆ، د دیدارەکێ دا بۆ ڕۆژناما ”هەولێر”دیار کر کو پەنا برن بۆ یاسایێ د جڤاکێ مە دا نە ل ئاستێ پێدڤیە، ئو هێشتا قۆناغ ماینە بۆ مە کو ئەم یاسایێ ب خودانێ خوە ب دانین، ئو دادگەهێ بکەینە مالا ئێکلاکەر بۆ هەمی ئاریشە و ناکۆکیان. بێ گۆمان ئەڤێ چەندێ ژی ئەگەرێن خوە هەنە، ئێك ژ وان ئەگەران بۆ ڕەوشەنبیریا یاسایێ یا خەلکێ د زڤڕیت کو هێشتا مە وەكو جڤاك باوەریەکا مەزن ب یاسایێ نینە.
ناڤهاتی ئاماژە ب وێ چەندێ ژی کر کو عەشیرەتگەریێ کارتێکرن ل پڕۆسەیا پێشەڤەچوونا یاسایێ کریە، و پێدڤیە ئەڤ چەندە بهێتە ڕاوەستاندن، و یاسا جهێ خوە د جڤاکی دا بكەت، چونکی یاسا ب دادپەروەری و بێ لایەنگری ئاریشەیان ئێك لا دکەت. یاسا خودانێ هەمی کەسانە بێ جووداهیا ڕەگەزی و ڕەنگ و هۆز و عەشیر و نەتەوە و ئاین و ئایدۆلۆژی و بەرژەوەندیان، ژ بەر ئەڤێ چەندێ پێدڤیە هەموو تەخ و چینێن جڤاکی باوەریێ ب یاسایێ بینن، چونکی چارەسەریا دوماهیێ هەر بۆ یاسایێ یە. ل سەر دەستێ یاسایێ پێشکەفتن پەیدا دبیت، لەوما دا کو ئەم زۆلم و زۆرداریێ ل نفشێ پاشەڕۆژێ نەکەین، دڤێت ئەم ڕێزێ ل یاسایێ بگرین و بێ مەرج پێگیریێ پێ بکەین و بەرژەوەندیێن خوە بدەینە لایەکێ، چونكی پێشکەفتنا جڤاکی پێشکەفتنا هەمی تاکێن جڤاکی یە.
ئاشکرا ژی کر کو د ئەڤرۆکە دا تێگەهێ یاسایێ هاتیە گۆهوڕین ئانکو کارێ یاسایێ ب تنێ سزا دانا خەلکێ نینە ل دەمێ سەرپێچیکرنێ، بەلکو بەڕەڤانیکرن و چارەسەرکرن و ڕێکخستن و پێشڤەبرن ژی ژ کارێن سەرەکی یێن یاسایێ یە، ژبەر ئەڤێ چەندێ یاسایێ کاریگەریەکا مەزن ل سەر جڤاکی هەیە. گەشەکرنا مرۆڤی د جڤاکەکێ نە دادپەروەر دا گەلەك ب زەحمەت و پڕ ئاریشەیە، چونکی دادپەروەریا جڤاکی ڕێك خوەشکەرە بۆ گەشەکرنا هەمی مرۆڤان. جڤاکێن دادپەروەر وەکو ئاخەکا پڕ بەرەکەت و باشە بۆ چاندنا هەمی تۆڤان، و جڤاکێ نە دادپەروەر ژی وەکو ئاخەکا بێ خێرە باشترین تۆڤ لێ شین نابیت.
گۆت ژی:”ئاشتی و ئارامیا جڤاکی ب یاسایێ بەرقرار دبیت، لێ نابیت بهێتە ژ بیرکرن یاسا ب تنێ ئالاڤە. ژ بەر ڤێ چەندێ ئەم پێدڤی ب دەستهەلاتەکا دیموکرات و دادپەروەرن، و خەلکەکێ هشیار و ژیرمەندن، چونکی هندی ئاستێ ژیریا خەلکێ بلند بیت لادانێن یاسایێ کێمتر دبن، و هندی ئاستێ ژیریا خەلکێ لاواز بیت لادان و سەرپێچیێن یاسایێ زێدەتر دبن. دگەل زێدەبوونا لادانێن یاسایێ ئاشتی و ئارامیا جڤاکی دکەڤیتە بەر پسیارێ”.
زێدەتر ژی گۆت: “یاسا بخوە ئالاڤێ ڕێكخستنا جڤاکیە و بێ گومان د شێت جڤاکی ڕێك بێخیت، لێ ئەگەر جڤاك گرنگیێ ب یاسایێ نەدەت و هندەك پرەنسیپ و بنەمایێن دی جهێ یاسایێ بگرن، وەکو عەشیرەتگەری و لایەنگری و بەرژەوەندی، بێ گومان یاسا نەشێت جڤاکی ب وێنەیەکێ دروست وێنە بکەت. لەوما ب هەمی ڕەنگ و پیڤەران جڤاکی پێدڤی ب یاسایێ هەیە، چونکی باشترین و زەلالترین ئالاڤ بۆ رێکخستنا جڤاکی یاسایە. ئەم د شێن بێژین پێدڤیا جڤاکی بۆ یاسایێ وەك پێدڤیا گولێ یە ب ئاڤێ، و پێدڤیا مێشکی یە ب هەناسێ”.