ئەمرۆ دووشەممە 2024.12.16، بە ئامادەبوونى ئومێد خۆشناو، پارێزگارى هەولێر، لە پێناو بەهێزکردن و دەوڵەمەندکردنی کولتوور و فراوانکردنی بازنەی چالاکییە زانستى و پەروەردەییەکان، لە کتێبخانەى زانکۆی تیشک، گۆشەیەى تایبەتى کۆریا (Korea Corner) کرایەوە.
لەڕێورەسمەکەدا کە هەریەک لە سینگچۆل لیم، کونسوڵی گشتیی کۆماری کۆریای باشور لە هەولێر و فەلاح مستەفا، ڕاوێژکارى سەرۆکى هەرێم و سەرۆکى زانکۆ و مامۆستا و قوتابیان ئامادەى بوون، دواى کردنەوەى لەلایەن ئامادەبووانەوە، پارێزگارى هەولێر، ویڕاى دەستخۆشى لە کردنەوەى ئەو گۆشەیە، هیواى خواست بۆ قوتابیان سود بەخش بێت و ڕۆڵى زانکۆى تیشکیش وەک دامەزراوەیەکى زانستى لە گرنگیدان بە کتێب و سەرچاوە زانستییەکان بەرز نرخاند.
ئامانج لەکردنەوەى ئەو گۆشەیە، گەیاندنی زانیاری و بەخشینی سەرچاوەی زانستی و کۆرسی خوێندنە، کە وەک ناوەندێکی زانیاری دەیان کتێبى لە بوارە جیاکانى زانست و مەعرفى لە خۆ گرتووە و دەبێتە سەرچاوەیەکى گرنگ بۆ قوتابیانى زانکۆکە.