ئەمڕۆ دووشەممە 2024.11.25، ئومێد خۆشناو، پارێزگارى هه‌ولێر، له دیوانى پارێزگا، پێشوازی ماکسیم ڕۆبین، کونسولی گشتیی روسیا لە ھەولێر کرد.
لە دیدارێکدا، بیروڕا لە بارەی پەیوەندیەکانی نێوان ھەرێمی کوردستان و وڵاتی روسیا ئاڵوگۆڕکران و جەخت لە بەردەوامی پەیوەندیەکانی نێوان ھەردوولا کرایەوە، لەوبارەیەشەوە پارێزگارى هەولێر تەئکیدى لە پەیوەندیە مێژوویەكانی نێوان هەردوو گەلی كوردستان و گەلی ڕووسیا کردەوە و ئومێدى خواست بەڕێزیان هۆکارێک بێت بۆ زیاتر بەرەوپێشبردنى پەیوەندییە مێژووییەکانى نێوان هەرێمى کوردستان و وڵاتەکەى.
لەبەرامبەردا کونسولی گشتیی ڕوسیا، پێزانینی بۆ پشتگیری و هەماهەنگیی پارێزگارى هەولێر لەگەڵ کونسولخانە دەربڕی و پێگەی هەرێمی كوردستانی بۆ وڵاتەكەی بە گرنگ وەسف كرد و ئامادەیی وڵاتەکەی بۆ بەهێزترکردنی پەیوەندییەکان لەگەڵ هەرێمى کوردستان لە بوارە جۆراوجۆرەکاندا نیشان دا.
لە تەوەرێکی تری دیدارەکەدا، باس لە دەستپێکردنی میکانیزمی دەستەخوشکی هەولێر و شاری تولای ڕوسیا کرا، بۆ ئەو مەبەستەش هەردوولا جەختیان لە ئامادەکارییەکان کردەوە.