پارێزگارى هەولێر، پێشوازى لە شاندێکى ڕێکخراوى نەدوەى جیهانى لاوان کرد
ئەمڕۆ چوارشەممە 2024.8.14، ئومێد خۆشناو، پارێزگارى هەولێر، لە دیوانى پارێزگا، پێشوازى کرد لە د.منیر سدیق سەعدوڵڵا ئامێدى، بەڕێوەبەرى نووسینگەى کوردستانى ڕێکخراوى نەدوەى جیهانى لاوان و شاندێکى یاوەرى.
لە دیدارەکەدا، گفتوگۆ لە بارەى کار و چالاکییەکانى ڕێکخراوى ناوبراو لە بوارەکانى ئاوەدانکردنەوە و گرنگیدان بە تواناکانى لاوان و خزمەتکردنى هاوڵاتییان لە بوارى تەندروستى و یارمەتیدانى منداڵانى بێ سەرپەرشتیار کرا.
لەلایەن خۆیەوە پارێزگارى هەولێر وێڕاى بەرزنرخاندنى کارەکانى ڕێکخراوى ناوبراو لە سنوورى پارێزگاى هەولێر، وەک پارێزگاى هەولێر ئامادەیی هەموو هاوکارى و هەماهەنگى و هاریکارییەکى بۆ سەرخستنى کارەکانیان نیشاندا.