دەستەی دادوەریی هەڵبژاردنەکانی عێراق ٣ حزبی سەر بە پەکەکەی هەڵوەشاندەوە

پەیامنێری هەولێر

لە بڕیارێکدا کە بە نووسراو ئاراستە کراوە، دەستەی دادوەریی هەڵبژاردنەکانی سەر بە ئەنجوومەنی باڵای دادوەری لە عێراق، چەند حزبێکی لە مافی هەڵبژاردن بێ بەش کرد و بڕیاریشی دا بارەگاکانیان دابخرێت و ڕێگەی کاری سیاسیان پێ نەدرێت لە عێراق.

بە پێی بڕیاری دەستەکە، لەسەر داوای فەرمانگەی کاروباری حزب و ڕێکخراوە سیاسییەکان، بڕیاریداوە هەر یەکە لە حزبەکانی (ئازادی دیموکراتی ئێزدی، بەرەی تێکۆشانی دیموکراتی و تەڤگەری ئازادی) هەڵدەوەشێندرێنەوە و بارەگاکانیان دادەخرێت و دەست بەسەر ماڵ و موڵکەکانیاندا دەگیرێت.
هەر لە بڕیارەکەیاند ئاماژەیان بەوەش کردووە؛ دوای لێکۆڵینەوەی فەرمانگەی کاروباری حزب و ڕێکخراوە سیاسییەکان و زانیارییەکانی دەزگای هەواڵگری عێراق، ئەوە پشتڕاست کراوەتەوە ئەو حزابە پەیوەندییان بە پەکەکەوە هەیە.
بڕیارەکەش، لە 1ـی ئابی 2024 دەرچووە و لەسەر بنەمای یاسای پارتە سیاسییەکانی عێراق دەرچووێندراوە

چاودێرانی سیاسی، لەوبارەیەوە قسەیان بۆ “هەولێر” کردووە و بە بڕوای کاوە سلێمان، پەکەکە چەندین ساڵە بە نایاسایی لە عێراق و هەرێمی کوردستان خەریکی کاری ڕێکخستنە کە ئەویش پێچەوانەی یاسایە. سەبارەت بە بڕیارەکەی دەستەی داوەریی هەڵبژاردنەکانی عێراقیش، ئاماژە بەوە دەکات، بڕیارەکە لەسەر بنەمای کۆمەڵێک ڕاپۆرتی ورد و زانیاری هەواڵگری دراوە، چونکە ڕێگری کردن لە کاری سیاسی و حزبی و ڕێکخراوەیی بە پێی یاسا کارێکی ئاسان نییە و دەبێت بەڵگە و دۆکیۆمێنتی بەهێز هەبێت. ئەو چاودێرە، باس لەوەش دەکات، ڕێکخستنەکانی پەکەکە لە باکوری کوردستان و وڵاتی تورکیا بە تەواوی مایە پوچ بوونە، چونکە خەڵکی باکوری کوردستان بە تەواوی ڕووی ڕاستی پەکەکەیان بۆ دەرکەوتووە، بەڵام پەکەکە بە چاوساغی چەند لایەنێکی چەکداری عێراقی کە خۆشیان نایاسایین لە پێناو دژایەتی هەرێمی کوردستان و حوکمڕانییەکەی سەرئێشە و کۆسپ دروست دەکات و دەیەوێت ڕای گشتی کوردانی پارچەکانی کوردستان بۆ ئەو ئاقارە ڕابکێشێت کە هەرێمی کوردستان لایەنگری تورکیایە لە هاوکێشەی ناوچەکە، دەشڵێت؛ بەداخەوە هەندێک میدیای نابەرپرس ئەو بانگەشەیەی پەکەکە بە شێوازی جۆراوجۆر بڵاو دەکەنەوە و خەڵکانێکیان پێی فریو داوە.

بەپێی یاسای حزبە سیاسییەكانی ساڵی 2015ی عێراق، ئەو حزبانەی كە كاری سیاسیی خۆیان دەکەن لە عێراق نابێت وابەستەی ڕێكخستن و دارایی هەر لایەنێكی دیكەی غەیرە عێراقی ببن یان فەرمان لە حزبی تر یان هەر وڵاتێكی دیكە و لایەنێكی دەرەكی وەربگرن، جگە لەوەی لێیان قەدەغە كراون كە هاریكاری لەگەڵ حزبە سیاسییە قەدەغەكراوەكان بكەن. لەژێر ڕۆشنایی ئەو یاسایە و بەپێی ماددە 32ی یاسای حزبە سیاسییەكان، دادگا (دەستەی دادوەری) بڕیاری دا كە سەرجەم ئەو حزبانە هەلوەشێندرێنەوە و بارەگاكانیان دابخرێن و دەست بەسەر موڵك و ماڵەكانیاندا بگیرێت کە ئاشکرا بووە سەر بە پەکەکەن و تەنانەت چەندین چالاکی نهێنیشیان بۆ پەکەکە لە ناو خاکی عێراق کردووە، ئەو حزبانەش کە ناویان هاتووە پێکهاتوون لە (پارتی ئازادی و دیموكراسیی ئێزدی، پارتی بەرەی تێكۆشانی دیموكراسی و تەڤگەری ئازادیی كۆمەڵگەی كورستان (تەڤگەری ئازادی).
چالاکوانێکی مەدەنیش هەر لەو بارەیەوە، بە “هەولێر”ی راگەیاندووە؛ بڕیارەکەی دەستەی دادوەریی هەڵبژاردنەکانی عێراق لەبارەی داخستنی ئەو پارتانەوە بڕیارێکی دروست بوو بە ئاراستەی پاراستنی ئارامی و سەقامگیریی شارەکانی هەرێمی کوردستان و دەشڵێت؛ بێگومان ئەو بڕیارە کاریگەریی دەبێت بۆ ئەوەی زووتر خاڵەکانی ڕێککەوتنی شنگال بەرەو جێبەجێ کردن بچن و حکوومەتی عێراق لەژێر ڕۆشنایی ئەو یاسا و بڕیارانەدا هەوڵبدات چەکدارانی پەکەکە کە بە پاڵپشتی چەند گرووپێکی میلیشیایی ئێستا لە شنگالن وەدەر بنرێن و کۆسی بەردەم گەڕانەوەی ئاوارەکانی شنگال نەمێنێت.