چوارشه‌ممه 17ـی تەممووزی 2024، ئومێد خۆشناو، پارێزگاری هه‌ولێر له دیوانی پارێزگا پێشوازیی له یان برایم، کونسوڵی گشتی فه‌ره‌نسا و شاندی یاوه‌ری كرد.
بەپێی ڕاگەیاندراوی پارێزگای هەولێر، لەو دیدارەدا، پارێزگاری هه‌ولێر ڕایگه‌یاند: ئاماده‌بوونی سه‌رۆك بارزانی له ڕێوڕه‌سمی ڕۆژی نیشتمانیی فه‌ره‌نسا دووپاتكردنه‌وه‌ی خۆشه‌ویستی و هاوپه‌یمانیی و هاوبه‌شی نێوان گه‌لی كورد و فه‌ره‌نسایه.
هاوکات، پارێزگاری هه‌ولێر سوپاسی هاوكارییه‌كانی حكوومه‌ت و گه‌لی فه‌ره‌نسای بۆ گه‌لی كورد و حكوومه‌تی هه‌رێمی كوردستان كرد، داوای كرد هاوكاریی و پێكه‌وه‌كاركردنی هه‌ردوولا بۆ رووبه‌ڕووبوونه‌وه‌ی تیرۆر له ناوچه‌كه، به‌رده‌وام بێت.
پارێزگاری هه‌ولێر ئاماژه‌ی به پڕۆژه‌ی دروستكردنی ڕێڕه‌وی پایسكلسواری له‌هه‌ولێر كرد و ڕایگه‌یاند: سوودی زۆرمان له بیرۆكه‌كانی ئان هیداڵگۆ، سه‌رۆكی شاره‌وانیی پاریس وه‌رگرتووه كه له ڕێگه‌ی پڕۆژه‌یه‌كه‌وه پاریسی له خنكانی هاتووچۆی ئۆتۆمبێل ڕزگاركرد و هه‌ولێریش له ئەمڕۆوە ده‌یه‌وێت ئه‌و هه‌نگاوه بنێت.
ئاشكراشی كرد، له پێناو سه‌رخستنی ئه‌و پڕۆژه‌یه و پاراستنی ژینگه و كه‌مكردنه‌وه‌ی كاریگه‌رییه نه‌رێنییه‌كانی كه‌شوهه‌وا و كه‌مكردنه‌وه‌ی قه‌ره‌باڵغی، سوود له شاره فەرەنسیزمانەکانیش وه‌رده‌گرین.
لە بەرامبەردا، كونسوڵی فه‌ڕه‌نسا له هه‌رێمی كوردستان دووپاتی بره‌ودان و به‌هێزكردنی په‌یوه‌ندییه مێژوویی و دۆستاییه‌تییه‌كانی نێوان گه‌لی كورد و فه‌ره‌نسای كرده‌وه، هاوکات خۆشحاڵیی خۆی به به‌شداری و ئاماده‌بوونی پارێزگاری هه‌ولێر له ئاهه‌نگی ده‌ستپێكی یارییه‌كانی ئۆلۆمپیادی پاریس ده‌ربڕی كه له 26ـی ته‌مموز ده‌ست پێ ده‌كات و تاكو 11ـی ئاب به‌رده‌وام ده‌بێت.
پرۆسه‌ی سیاسی له هه‌رێمی كوردستان و بابه‌تی ئاماده‌كارییه‌كان بۆ هه‌ڵبژاردنی په‌رله‌مانی كوردستان ته‌وه‌رێكی دیكه‌ی دیداره‌كه بوو، كونسوڵی فه‌ره‌نسا هیوای سه‌ركه‌وتنی بۆ پرۆسه‌كه خواست.
له پێناو جه‌ختكردنه‌وه له دۆستایه‌تی نێوان هه‌ردوو گه‌لی فه‌ره‌نسا و كورد، هه‌ردولا ڕێككه‌وتن رێوڕه‌سمێكی شایسته له‌سه‌ر قه‌ڵای هه‌ولێر به بۆنه‌ی ده‌ستپێكی یارییه‌كانی ئۆلۆمپیاد له پاریس رێك بخه‌ن و لەوێدا مێژووی دۆستایه‌تی پاریس و هه‌ولێر دووپات بكه‌نه‌وه