بە گوژمەی 7 ملیار دینار پرۆژەی نۆژەنکردنەوەی ڕێگەی دۆڵی بالیسان و خۆشناوەتی جێبەجێ دەکرێت
وەزیری ئاوەدانکردنەوە و نیشتەجێبوونی هەرێمی کوردستان ڕایگەیاند، بە گوژمەی حەوت ملیار دینار پرۆژەی ڕێگەی دۆڵی بالیسان و خۆشناوەتی جێبەجێ دەکرێت.
سێشەممە، 16ـی تەمموزی 2024، دانا عەبدولکەریم، وەزیری ئاوەدانکردنەوە و نیشتەجێبوونی حکوومەتی هەرێمی کوردستان، لە کۆنگرەیەکی ڕۆژنامەوانیدا ڕایگەیاند: ئەم ناوچەیە یەکێکە لەو ناوچانەی کە قوربانییەکی زۆری داوە و ڕۆڵێکی بەرچاویشی هەبووە لە ڕابردوودا و شایانی خزمەتگوزاری زیاترن؛ ئەرکی حکوومەتی هەرێمی کوردستان و وەزارەتی ئاوەدانکردنەوەشە خزمەتی ئەم ناوچەیە بکات، بۆیە لە ڕۆژانی پشووشدا تیمەکانمان بەردەوام کار دەکەن.
ئەو وەزیرە دەڵێت “لە چەند ساڵی ڕابردوو بەهۆی قەیرانی داراییەوە پڕۆژەی ڕێگەی دۆڵی بالیسان و خۆشناوەتی جێبەجێکردنەکەی دوا کەوت، ئەمساڵ کەوتووەتە بواری جێبەجێکردن و نۆژەنکردنەوەی ڕێگەی بالیسان بە درێژی 23،5 کیلۆمەترە لە قۆناغی قیرتاوکردندایە بە گوژمەی زیاتر لە حەوت ملیار دینار کە هەردوو ئیدارەی ڕاپەرین و سۆران پێکەوە دەبەستێتەوە جێبەجێ دەکرێت”.
هەروەها، “پرۆژەکە لە دوو چینی قیر کە بەلیزەر ستاپ لایزەر بە ئەستووری 10 سانتیمەتر و چینی بایندەر بە ئەستووری شەش سانتیمەتر جێبەجێ دەکرێت” ئەم پرۆژە بۆ ئێمە گرنگە لەماوەی 210 ڕۆژ تەواو بکرێت”.
دانا عەبدولکەریم دەشڵێت: “بەداخەوە گرفتە داراییەکان تا ئێستە بەردەوامە، ئەم کۆمپانیایەش کە پرۆژەکەی لایە، یەکێکە لە کۆمپانیا باشەکان و کاری باشی کردووە، هەروەها سوپاسی تیمەکەی خۆم دەکەم لە بەڕێوەبەرایەتیی گشتیی ڕاپەرین و پاراستن و چاکردنی ڕێگاوبانی هەولێر، کە بەردەوام بوون لە چاودێریی کردنی جۆرایەتیی پرۆژەکان بەردەوام کۆنترۆڵی ئەو بڕگانە دەکەن کە جێبەجێ دەکرێت”