ئاسایشی هەولێر دوو كەس دەستگیر دەكەن كە لە شاری مووسڵ كەسێكیان كوشتبوو
بەڕێوەبەرایەتی ئاسایشی هەولێر ئەمڕۆ دووشەممە دەستگیركردنی دوو كەسی رایگەیاند كە دوو مانگ بەر لە ئێستا لە شاری مووسڵ تاوانێكی كوشتنیان ئەنجامدابوو.
ئاسایشی هەولێر رایگەیاند: لە مانگی 4ی ئەمساڵ لە شاری مووسڵ لە گەڕکی (میثاق) هاووڵاتییەک بە ناوی (عارف حامد) کوژراوە، دوای ئەنجامدانی تاوانەکە بکوژەکان هەڵاتوون بۆ شاری هەولێر و خۆیان لە شوێنیک حەشارداوە.
راشیگەیاند: لەلایەن پۆلیسی شاری مووسڵ بە ڕێگای ژووری هەمانگییەوە، وەزارەتی ناوخۆى حکوومەتی هەرێمی کوردستانیان ئاگادار کردەوە، دوای ئەنجامدانی بەدواداچوون لەلایەن هێزەکانمانەوە شوێنی بکوژەکانمان ئاشکرا کرد.
هەروەها رایگەیاند: بە فەرمانی دادوەری لێکۆڵینەوەی ئاسایشی هەولێر و بەپێی ماددەی (406) لە یاسای سزادانی عێراقی هەردوو بكوژمان دەستگیر کرد بە ناوەکانی (ح، س، أ) و (ع، س، أ).
ئاسایشی هەولێر ئاماژەی بەوەش دا كە لە لێکۆڵینەوەکان دەرکەوت كە هۆکاری کوشتنی هاووڵاتییەكە دەگەڕێتەوە بۆ کێشەیەکی کۆمەڵایەتی نێوان هەردوولا.