سەرۆکی ئەرکان پێشوازی لە فەرماندەی هێزەکانی ئەڵمانیا کرد

راگەیاندنی وەزارەتی پێشمەرگە

ئەمڕۆ ٩ی حوزیرانی ٢٠٢٤، فەریق روکن عیسا عوزێر سەرۆکی ئەرکانی وەزارەتی پێشمەرگە، لە دیوانی وەزارەت پێشوازی لە کۆڵۆنێڵ لارس پێرسیکۆڤسکی فەرماندەی هێزەکانی ئەڵمانیا لەهەرێمی کوردستان و شاندێکی یاوەری کرد.

لەو دیدارەدا، کە لیوا روکن محمد سعید بەڕێوبەری هەماهەنگی و پەیوەندییەکانی وەزارەت ئامادەیبوو، تاوتوێی پڕۆژە و پلانی نوێی وڵاتی ئەڵمانیا بۆ هێزی پێشمەرگەی کوردستان کرا، هاوکات گفتوگۆ دەربارەی ئامادەکارییەکانی وڵاتی ئەڵمانیا و خستنەڕووی پلانی نوێی هاوکاری و هاوئاهەنگیەکانی تیمی ڕاوێژکارانی ئەو وڵاتە بۆ وەزارەتی پێشمەرگە کرا.

سەرۆکی ئەرکان، لەگەڵ دەربڕینی سوپاس و پێزانینی وەزارەتی پێشمەرگە، بۆ پشتگیری هاوپەیمانان و تیمی سەربازی وڵاتی ئەڵمانیا بۆ هێزەکانی پێشمەرگە، دووپاتیکردەوە: گرنگی دانی زیاتر بە بوارە جیاوازەکان بۆ ڕێکخستنی هێزی پێشمەرگە لە چوارچێوەی پڕۆگرامی چاکسازی، کاری لەپێشینەی وەزارەتی پێشمەرگەیە و بەردەوامیش دەبێت لەم ئەرکە پیرۆزەدا، بۆ ئەمەش چاوەڕوانی زیاترمان لە هاوکاری و هەماهەنگیەکانی دۆستانمان لە هاوپەیمانیەتی نێودەوڵەتی هەیە.