ئەمڕۆ سێشه‌ممه 2024.4.16، بە ئامادەبوونى ئومێد خۆشناو، پارێزگارى هەولێر و بەیاوەری کاروان کەریم خان، قائیمقامی قەزایی شەقڵاوە و د.دلۆڤان محمەد، بەڕێوەبەری گشتی تەندروستیى هەولێر و لوقمان سەعید، بەڕێوەبەری گشتیی پەروەردەی هەولێر و بەڕێوەبەرانی پەروەردە و نەخۆشخانەی گشتی شەقڵاوە، لە چوارچێوەی گرتنەبەری ڕێوشوێنەكانی پاراستنی تەندروستی هاووڵاتییان و لە پێناو بەرگرتن لە مەترسییەکانی تووشبوون بە نەخۆشی سورێژە، لە قوتابخانەى خامه له سابيرئاواى قەزایی شەقڵاوە، هەڵمەتی نیشتمانی (10) ڕۆژەى كوتان دژی نەخۆشی سورێژە بۆ منداڵانی باخچەی ساوایان و قوتابیانی قۆناغەکانی یەكەم تاكو شەشەمی بنەڕەتی قوتابخانە حکومی و ناحکومییەکان دەستیپێکرد.
لەوبارەیەشەوە پارێزگارى هەولێر، لە وتارێکدا ئاماژەى بەوەدا، کە ئەم هەڵمەتە هەڵمەتێکى نیشتمانیى گشتگیرە و ئامانج لێى پاراستنی تەندروستی نەوەکانی ئاییندەیە، داواشی لە دایک و باوکان کرد هاوکارى تیمە تەندروستییەکان و ئیدارەی قوتابخانەکانبن بۆ کوتانی منداڵەکانیان.
جێگەى باسە، هەڵمەتەکە کە لەلایەن وەزارەتی تەندروستی هەرێم بە هاوبەشی وەزارەتی تەندروستی عێراق و ڕێكخراوی تەندروستیی جیهانی WHO و ڕێكخراوی یونسێف، بە ئامانجی پته‌وكردنی به‌رگری منداڵان لە تووش بوون بە سورێژه کە نەخۆشییەكی ڤایرۆسی گواستراوەیە لەلایەن چەندین تیم لە کارمەندمانی تەندروستی لە (326) قوتابخانە و باخچەی ساوایانی حکومی و ناحکومی سنووری پارێزگای هەولێر بۆ کۆتانی (114 هەزار) منداڵ لە ماوەى (10) ڕۆژ بەردەوام دەبێت.