وەزیری تەندروستی ئاشكرای كرد، لە دوای سەردانەكەی مەسرور بارزانی سەرۆکی حکوومەتی هەرێمی کوردستان بۆ هەڵەبجە، بڕیاردرا 130 كارمەندی تەندروستی بۆ نەخۆشخانەی بیارە دابمەزرێن.
د. سامان بەرزنجی وەزیری تەندروستی ڕاگەیاند: لەسەر بودجەی حکوومەتی هەرێم بە بڕی یەک ملیار دینار ئامێر و پێداویستیی پزیشکی بۆ نەخۆشخانەی بیارە تەرخان کرا، هەروەها 130 کارمەندی تەندروستی بۆ دامەزرێنرا.
راشیگەیاند: جگە لەوە، کارگەی بەرهەمهێنانی ئۆکسجین بە بڕی 385 ملیۆن و سەنتەری نەخۆشییەکانی شێرپەنجەی مەمک و هەرس و گەدە بە 500 ملیۆن بەردەست کرا، جگە لە ئامبولانس و ئامێرە ستراتیژییە پزیشکییەکان و ئامێرەکانی دیکە کە بە هەمووی 7 ملیار دیناری تێدەچێت.
حکوومەتی هەرێمی کوردستان دابینکردنی خزمەتگوزارییە تەندروستییەکان بە لەپێشترین ئەرک دەزانێت و لەمڕووەوە خزمەتی پارێزگا و ئیدارە سەربەخۆکان دەکات.