به‌يانيى ئه‌مڕۆ يه‌كشه‌ممه 2024/2/18، به‌ڕێز نێچيرڤان بارزانى، سه‌رۆكى هه‌رێمى كوردستان، له كۆنفرانسى ئاساييشى ميونشن له ئه‌ڵمانيا، له كۆبوونه‌وه‌يه‌كدا له‌گه‌ڵ خاتوو سێلێست واڵنده‌ر ياريده‌ده‌رى وه‌زيرى به‌رگريى ئه‌مه‌ريكا بۆ كاروبارى ئاسايشى نێوده‌وڵه‌تى، هه‌ڕه‌شه و مه‌ترسييه ئه‌منييه‌كان له عێراق و دۆخى ئاڵۆزى ڕۆژهه‌ڵاتى ناوه‌ڕاستيان تاوتوێ كرد.
هه‌ردوولا هاواڕا بوون كه ئارامى و سه‌قامگيريى ئه‌منى و سياسيى عێراق و هه‌رێمى كوردستان بۆ ناوچه‌كه گرنگه و له كاتێكدا ئه‌گه‌رى ته‌شه‌نه‌سه‌ندنى زياترى لێكه‌وته‌كانى شه‌ڕ له غه‌ززه، هه‌ڕه‌شه و مه‌ترسى له‌سه‌ر ناوچه‌كه دروست ده‌كات، ده‌بێ عێراق هه‌موو هه‌وڵێك بدات نه‌خزێته ناو كێشه‌كانه‌وه و قورسايى بخاته سه‌ر به‌ره‌نگاربوونه‌وه‌ى تيرۆر و هه‌ڕه‌شه و مه‌ترسييه‌كانى داعش.
له ته‌وه‌رێكى ديكه‌ى كۆبوونه‌وه‌كه‌دا باس له كاردانه‌وه و كاريگه‌ريى نه‌رێنيى به‌ئامانجگرتن و په‌لاماردانى هێزه‌كانى هاوپه‌يمانان له عێراق و هه‌رێمى كوردستان كرا. له‌مباريه‌وه جه‌خت له پێويستيى ڕێگرتن له‌و كرده‌وانه كرايه‌وه كه هه‌ڕه‌شه له دۆخى ئاساييش و سه‌قامگيريى ئه‌منى و سه‌روه‌ريى وڵات ده‌كه‌ن.
هاريكاريى هاوبه‌شى ئه‌منيى ئه‌مه‌ريكا له‌گه‌ڵ عێراق له چوارچێوه‌ى ڕێككه‌وتنى ستراتيژيى نێوان هه‌ردوولادا، ته‌وه‌رێكى ديكه‌ى كۆبوونه‌وه‌كه بوو.