سه‌رۆكایه‌تی هه‌رێمی كوردستان رایده‌گه‌یه‌نێت، سه‌رۆكی هه‌رێم و کۆمسیاری باڵای نەتەوەیەکگرتووەکان بۆ مافەکانی مرۆڤ، دۆخى مافى مرۆڤ و ئازادييه‌كان، زه‌مينه‌ى كار و چالاكيى رێكخراوه‌كانى كۆمه‌ڵگه‌ى مه‌ده‌نى و ئازاديى راگه‌ياندنیان تاووتوێكرد.
به گوێره‌ی زانیارییه‌كانی ماڵپه‌ڕی سه‌رۆكایه‌تی هه‌رێمی كوردستان، ئێواره‌ى ئه‌مڕۆ (دوو‌شه‌ممه 7ـی ئابی 2023) نێچيرڤان بارزانى سه‌رۆكى هه‌رێمى كوردستان، پێشوازى له ڤۆلکەر تورک کۆمسیاری باڵای نەتەوەیەکگرتووەکان بۆ مافەکانی مرۆڤ و شاندێکی یاوەری كرد.
له كۆبوونه‌وه‌يه‌كدا تيشكخرايه سه‌ر ئامانجى سه‌ردانه‌كه‌يان كه يه‌كه‌م جاره دێنه عێراق و هه‌رێمى كوردستان، هه‌روه‌ها دۆخى مافى مرۆڤ و ئازادييه‌كان، زه‌مينه‌ى كار و چالاكيى رێكخراوه‌كانى كۆمه‌ڵگه‌ى مه‌ده‌نى و ئازاديى راگه‌ياندن و راده‌بڕين و كارى رۆژنامه‌وانى له عێراق و هه‌رێمى كوردستان و ده‌ر‌فه‌ت و كێشه‌كانى، تاووتوێكران.
له‌مباره‌يه‌وه كۆميسارى باڵاى نه‌ته‌وه‌يه‌كگرتووه‌كان بۆ مافه‌كانى مرۆڤ، وێڕاى باسكردن له به‌رنامه و ئامانجى سه‌ردانه‌كه‌ى، چه‌ند سه‌رنج و تێبينييه‌كى ده‌رباره‌ى هه‌ندێ له بواره‌كانى دۆخى مافى مرۆڤ و پرسى ئازادييه‌كان و كارى رێكخراوه مه‌ده‌نييه‌كان له عێراق و هه‌رێمى كوردستان خسته‌ڕوو.
لاى خۆيه‌وه نێچيرڤان بارزانى، وێراى ئه‌وه‌ى سه‌ردانه‌كه‌ى به گرنگ له قه‌ڵه‌م دا، پابه‌نديى هه‌رێمى كوردستانى به پاراستن و به‌ره‌وپێشبردنى ديموكراسى و مافه‌كانى مرۆڤ و ئازادييه‌كان و ئازاديى راده‌ربڕين و يه‌كسانى و دادپه‌وه‌رى دووپاتكرده‌وه.
داواشیكرد، دامه‌زراوه‌كانى نه‌ته‌وه‌يه‌كگرتووه‌كان تايبه‌ت به‌و بوارانه، وه‌ك هاوبه‌شێك هاوكارى و يارمه‌تى پێشكه‌ش به لايه‌نه په‌يوه‌نديداره‌كانى عێراق و هه‌رێمى كوردستان بكه‌ن، به‌تايبه‌تى كه عێراق و هه‌رێمى كوردستان له قۆناغى راگوزه‌ردان و پێويستييان به يارمه‌تى و پشتگيرى هه‌يه بۆ بره‌ودان به‌و بوارانه.
پێشتریش ئەحمەد سەحاف، گوتەبێژی وەزارەتی دەرەوەی عێراق رایگەیاندبوو، ڤۆلکەر تورک، کۆمسیاری باڵای نەتەوەیەکگرتووەکان گه‌یشتووه‌ته عێراق و سه‌ردانه‌كه 3 رۆژ ده‌خایەنێت.
سه‌حاف گوتبوی: ڤۆلکەر سه‌ردانی هه‌رێمی كوردستانیش ده‌كات و له‌وێ له‌گه‌ڵ به‌رپرسان كۆده‌بێته‌وه.