سەرۆکی حکومەتی هەرێمی کوردستان بە پێویستی دەزانێت “هەڵبژاردنی پەرلەمانی کوردستان لە زووترین کاتدا ئەنجامبدرێت”. جەختیش لە لە پێویستیی پابەندبوون و جێبەجێکردنی ڕێککەوتنەکانی نێوان هەردوو حکومەتی عێراق و هەرێمی کوردستان دەکاتەوە.
ئەمڕۆ دووشەممە 19ـی حوزەیرانی 2023، مەسرور بارزانی، سەرۆکی حکومەتی هەرێمی کوردستان پێشوازی لە هانس سادنی، باڵیۆزی شانشینی هۆڵەندا لە عێراق و شاندێکی یاوەری کرد.
بەگوێرەی راگەیەندراوێکی حکومەتی هەرێمی کوردستان، لە کۆبوونەوەکەدا بارودۆخی گشتیی و دوا پەرەسەندنەکانی دۆخی سیاسیی عێراق و پەرەپێدانی پەیوەندییەکانی هەرێمی کوردستان و هۆڵەندا تاوتوێ کراون.
لە بارەی دۆخی ناوخۆی هەرێمی کوردستانیشەوە، سەرۆکی حکومەت ئاماژەی بەوە داوە “ڕێگە نادەین بارودۆخی ناوخۆی هەرێم بکرێتە قوربانی داواکاری نادەستووری و نابەرپرسانە”. دووپاتیشی کردەوە “پێویستە هەڵبژاردنی پەرلەمانی کوردستان لە زووترین کاتدا ئەنجامبدرێت”.
ئەوەش خراوەتەڕوو، تەوەرێکی کۆبوونەوەکە گفتوگۆکردن بووە لەبارەی پەیوەندییەکانی هەرێمی کوردستان و حکومەتی فیدراڵ و گرنگی پاراستنی مافە دەستوورییەکانی هەرێمی کوردستان “سەرۆکی حکومەت جەختی لە پێویستیی پابەندبوون و جێبەجێکردنی ڕێککەوتنەکانی نێوان هەردوولا کردەوە، چونکە ئاسایش و سەقامگیریی عێراق بەندە بە جێبەجێکردنی دەستوور و ڕێزگرتن لە ڕێکەوتنەکان.”
هەر لە راگەیەندراوەکەدا ئاماژە بەوەش دراوە، باڵیۆزی هۆڵەندا لە عێراق، ئامادەیی وڵاتەکەی بۆ بەهێزکردنی پەیوەندییەکان لەگەڵ هەرێمی کوردستان لە بوارە جۆراوجۆەکاندا دەربڕی و پشتیوانی هۆڵەنداشی بۆ بەهێزبوون و گەشەسەندانی هەرێمی کوردستان لە چوارچێوەی عێراق فیدراڵدا دووپاتکردەوە.