ڕێبەر ئەحمەد، وەزیری ناوخۆی هەرێمی کوردستان، دوای ئەوەی بە سەردانێکی فەرمی ڕۆژی دووشەممە گەیشتە ئەمریکا چەندین دیدار و کۆبوونەوەی لەگەڵ بەرپرسانی ئەمریکا کرد، لە لێدوانێکی ڕۆژنامەوانیشدا، ڕایگەیاند؛ کۆبوونەوەکان گرنگ بوون و دەرئەنجامی باشیان هەبووە.
وەزیری ناوخۆ، ئەوەی خستەڕوو، کۆبوونەوەکانی چەند ڕۆژی ڕابردوویان لەگەڵ بەرپرسانی ئەمەریکا دەرئەنجامی باشیان هەبووە و وەکو خۆی دەڵێت، واشنتن پشتگیریی خۆی بۆ قەوارەی هەرێمی کوردستانی دووپاتکردووەتەوە و ئەزموونی هەرێمی کوردستانی لە بابەتی دیموکراسی و ئازادی ڕادەربڕین بەرز نرخاندووە.
ئەوەشی ڕاگەیاند؛ لە کۆبوونەوەکاندا باس لە ئارامی و سەقامگیریی عێراق و هەرێمی کوردستان کراوە “لە کۆبوونەوەکاندا پاراستنی هەرێمی کوردستان یەکێک لە سەرەکیترین بابەتەکان بوو و وەکو دۆستێکی نزیکی هێزەکانی هاوپەیمانان کە ڕووبەڕووی تیرۆرستانی داعش بوونەتەوە تەماشا دەکرا. هاوکات ڕۆڵی پێشمەرگە و هەرێمی کوردستان لەو چوارچێوەیەدا بەرز نرخێندرا”.
سەبارەت بە پەسەندکردنی بودجەی گشتیی عێراق، وەزیری ناوخۆی حکوومەتی هەرێمی کوردستان، ئاماژەی بەوە کردووە، لە کۆبوونەوەکاندا هەردوولا (هەرێمی کوردستان و ئەمەریکا) هاوڕابوون لەسەر ئەوەی دەستووری عێراق وەکو خۆی جێبەجێ بکرێت و گوتی: بەشێکی کەمی داواکارییەکانی هەرێمی کوردستان لەنێو دەستووردا جێیان بووەتەوە. هەموو ئەو داواکارییانەی دەمانویست، نەمانتوانی جێگەیان بکەینەوە، بەڵام لەگەڵ ئەوەشدا دەستوورێکە هەموومان لەسەری کۆکین، بەڵام بەداخەوە وەکو پێویست جێبەجێ نەکراوە.
ئەوەشی ڕاگەیاند؛ کێشەی سەرەکی ئێمە، کێشەی ماددەی 140 و گەڕانەوەی پەنابەرانە بۆ زێدی باب و باپیرانیان و ئەو ماددە دەستوورییانەیە کە تایبەتن بە بەشداریی کارا و سەیرکردنی هەرێمی کوردستان وەکو شەریکێکی ڕاستەقینە لە پڕۆسەی سیاسی عێراق و دروستکردنی بڕیاری سیاسی.
سەبارەت بە دەستکارییەکانی پرۆژەیاسای بودجە کە دوور لەو ڕێککەوتنانە بوو پێشوەختە لە نێوان هەرێم و عێراقدا کرابوون، وەزیری ناوخۆ ڕایگەیاند؛ دەستکارییەکانی پڕۆژەیاسای بودجە دووربوون لە ڕوحی پێکەوەژیان و دەستووری عێراق، “هەوڵ درا هەرێمی کوردستان پشتگوێ بخرێت، بەڵام لە دەرئەنجامدا ئیرادەی هێزەکانی وڵاتپارێز سەرکەوت و هەموو ئەو هەوڵانەی دەدران بۆ ئەوەی هەرێمی کوردستان لە پڕۆسەی بڕیاردان لە عێراق بەدەربخەن شکەستیان هێنا و بەهێز و بازوی وڵاتپارێزان ئەم پڕۆسەیە بەردەوام بێت”
وەزیری ناوخۆ، تیشکی خستە سەر پرۆسەی چاکسازیی وەزارەتی پیشمەرگە و گوتی: پرۆسەی چاکسازی لە ناو هێزەکانی پێشمەرگەدا پێشکەوتنی باشی کردووە و بەشێکی زۆری ئەو خاڵانەی کە لە لێکتێگەییشتنی نێوان وەزارەتی بەرگریی ئەمەریکا و وەزارەتی پێشمەرگەدا هاتوون، جێبەجێکراون و ئەنجامی باشیان هەبووە”
ئەوەشی خستەڕوو، ئەمەریکا خۆشحاڵی خۆی بە پرۆسەی چاکسازی لە نێو هێزەکانی پێشمەرگە دەربڕی و پابەندی خۆی نیشاندا بۆ ئەوەی هاوکاربن لەگەڵ هێزەکانی پێشمەرگە بۆ ئەوەی ببێتە هێزێکی توکمە و ڕێکخراو و بتوانێت بەرەنگاری هەموو هێرشەکان ببێتەوە کە ڕووبەڕووی دەبێتەوە”
هەر سەبارەت بە کۆبوونەوەکانیان لەگەڵ بەرپرسانی ئەمریکا، ئەوەشی گوت: ئێمە وەکو حکوومەتی هەرێمی کوردستان پێداگرین بەوەی دیمکراسییەتی هەرێمی کوردستان پەرەی پێ بدرێت و پێش بخرێت و نموونەی هەرێمی کوردستان لە ناوچەکەدا بەرز نرخێندرا.
لە بەشێکی دیکەی قسەکانیدا، ڕێبەر ئەحمەد، وەزیری ناوخۆی هەرێمی کوردستان، تیشکی خستە سەر بارودۆخی شنگال و جێبەجێ کردنی ڕیککەوتنی شنگال و باسی لەوە کرد، پرسی جێبەجێکردنی رێککەوتنی شنگال و ئەو ئاوارانەی کە لە کەمپەکانی هەرێمی کوردستان نیشتەجێن، یەكێک بوو لەو پرسە گرنگانەی لەگەڵ بەرپرسانی هەردوو وەزارەتی دەرەوە و ئەمەریکا تاوتوێیان کردووە.
هەر لەو بارەیەوە گوتی: ئەو هێزانەی بەدەر لە یاسا شنگالیان کۆنترۆڵ کردووە، بە پەکەکە و ئەو میلیشیانەی لەو شارە هەن، رێگری سەرەکین لە بەردەم جێبەجێکردنی ڕێککەوتنی شنگال، گوتیشی: لەبارەی جێبەجێکردنی ڕێککەوتنی شنگال بەردەوام لە پەیوەندیداین لەگەڵ حکومەتی عێراق و دۆستانمان لە هەردوو وەزارەتی دەرەوە و بەرگریی ئەمەریکا کە پشتگیری لە جێبەجێکردنی رێککەوتنەکە دەکەن، بۆ ئەوەی دۆخەکە ئاسایی ببێتەوە و ئاوارەکان بگەڕێنەوە زێدی خۆیان.
دوابەدوای کۆبوونەوەی نێوانیشینان، دوێنێ، ئوزرا زیا، ڕاسپێردراوی وەزیری دەرەوەی ئەمەریکا بۆ کاروباری ئاسایشی مەدەنی، ڕایگەیاند؛ شەرەفمەند بووە بە گفتوگۆی پاراستنی مافەکانی مرۆڤ و جێبەجێکردنی ڕێکەوتنی شەنگال لەگەڵ وەزیری ناوخۆی حکومەتی هەرێم.
ڕاسپێردراوی وەزیری دەرەوەی ئەمریکا بۆ کاروباری ئاسایشی مەدەنی ئاماژەی بەوەش دا، هەڵوێستە بەخشندەکانی حکومەتی هەرێم لە پشتیوانیکردنی بێماڵ و ئاوارەکان و هەوڵدانیان بۆ ڕووبەڕوبوونەوەی توندوتیژی لە سەر بنەمای ڕەگەز بەرز دەنرخێنن.