ئەمڕۆ یەکشەممە 7ـی ئایاری 2023، سەرۆک مەسعود بارزانی لە سەلاحەدین لەگەڵ مایک برایسن ریجاردسن، باڵیۆزی بەریتانیا لە عێراق کۆبووەوە.
بارەگای بارزانی لەوبارەیەوە رایگەیاند، لە دیدارەکە دا کە رۆزی کەیڤ کونسوڵی گشتی بەریتانیا لە هەولێر ئامادەی بوو، سەرۆک بارزانی پیرۆزبایی خۆی ئاراستەی گەلی بەریتانیا کرد بەبۆنەی تاج لە سەرنانی شا چارلسی سێیەم.
ئاماژەی بەوەشدرا، لە بەشێکی تری دیدارەکەدا بارودۆخی سیاسی عێراق و پەیوەندییەکانی نێوان هەردوو حکومەتی هەرێمی کوردستان و حکومەتی فیدڕاڵ تاوتوێ کران و جەختیش لە پەرەپێدان و باشترکردنی پەیوەندییەکانی نێوان هەردوولا کرایەوە.
بارەگای بارزانی راشیگەیاند، هەر لەو دیدارەدا بارودۆخی ناوخۆی هەرێمی کوردستان تاوتوێکرا و جەخت لە پێویستیی ئەنجامدانی هەڵبژاردن لە کاتی دیاریکراوی خۆی کرایەوە.