سەرۆکی حکومەتی هەرێمی کوردستان و میری ئێزدییان جەختیان لەسەر گرنگی جێبەجێکردنی رێککەوتننامەی شنگال کردەوە بۆ ئاساییکردنەوەی دەڤەرەکە لە پێناو ئاوەدانکردنەوە و گەڕانەوەی ئاوارەکان.
ئەمڕۆ یەکشەممە (16ـی نیسان/ئێپڕڵی 2023)، مەسرور بارزانی، سەرۆکی حکومەتی هەرێمی کوردستان پێشوازی لە میر حازم تەحسین بەگ، میری ئێزدییان کرد و لە دیدارەکەدا، گفتوگۆ لەبارەی دۆخی ئێزدییان و رەوشی دەڤەری شنگال بەتایبەتی کرا.
سەرۆکوەزیران مەسرور بارزانی وێڕای دووپاتکردنەوەی پشتیوانی حکومەتی هەرێمی کوردستان بۆ ماف و داخوازییەکانی ئێزدییان، جەختیشی لە گرنگیی جێبەجێکردنی رێککەوتننامەی شنگال و دەرچوونی میلیشیا و گرووپە چەکدارییە نایاساییەکان و ئاساییکردنەوەی دەڤەرەکە کردەوە لە پێناو ئاوەدانکردنەوە و گەڕانەوەی ئاوارەکان بۆ شوێنەکانیان.
میری ئێزدییان سوپاس و پێزانینی بۆ پشتیوانیی بەردەوامی حکومەتی هەرێمی کوردستان لە ئێزدییان و کەمکردنەوەی ئێش و ئازارەکانیان و گرنگیدان بە رۆڵی ئێزدییان لە دامەزراوەکانی حکومەت دەربڕی.