په‌يامى نێچيرڤان بارزانى له يادى جينۆسايدى كوردانى فه‌يليدا
نێچیرڤان بارزانی ،سەرۆكی هەرێمی كوردستان لە یادی جینۆسایدی كوردانی فەیلیدا پەیامێكی راگەیاند كە ئەمە دەقەكەیەتی ..
پەیامی نێچیرڤان بارزانی، لە یادی جینۆسایدی كوردانی فەیلیدا
ئەمڕۆ لە چل و سێیەمین ساڵیادی تاوانەكانی جینۆساید و بێسەروشوێنكردن و وڵاتبەدەركردنی خوشك و برایانی كوردی فەیلیدا، بە ڕێز و شكۆوە یادی شەهیدان و قوربانییانی ئەو تاوانانە دەكەینەوە.
ئەوەی دەرهەق بە كوردانی فەیلی كرا، پاكتاوێكی نەژادیی ڕەگەزپەرستانە بوو. تیایدا وێڕای بێسەروشوێنكردنی دەیان هەزار هاووڵاتیی بێتاوان، سەتان هەزاریشیان دووچاری ڕاگواستن و وڵاتبەدەركردن و زەوتكردنی ماڵ و موڵكیان و لێسەندنەوەی ڕەگەزنامە بوونەوە تەنها لەبەر كوردبوون و داكۆكیكردنیان لە ناسنامە و مافە ڕەواكانی میللەتەكەیان.
ناساندنی ئەو تاوانە بە جینۆساید لەلایەن دادگای باڵای تاوانەكانی عێراقەوە، حكوومەت و دەوڵەتی عێراق ڕووبەڕووی ئەرك و بەرپرسیاریەتیی یاسایی و مرۆیی دەكاتەوە بۆ قەرەبۆكردنەوەی قوربانییان. لەم یادەدا داوا لە حكوومەتی فیدراڵی عیراق دەكەین ئەركی خۆی بەجێ بگەیەنێت بە قەرەبۆكردنەوە و گێڕانەوەی سەرجەم مافە مەدەنی و ماددییەكانی كوردانی فەیلی.
دروود و سڵاو بۆ گیانی پاكی شەهیدانی كوردی فەیلی. سڵاو و ڕێز بۆ خانەوادە سەربەرزەكانیان. قوربانیدان و دڵسۆزیی خوشك و برایانی كوردی فەیلیمان، جێی شانازیی گەلەكەمانە و هەمیشە لە یادمانن.
نێچیرڤان بارزانی
سەرۆكی هەرێمی كوردستان
2023/4/4