باران بارین دەستپێدەکاتەوە

ئاراس جەبار،شارەزای بواری كەشناسی رایگەیاند: لە ئەنجامی كاریگەری ھاتنی نزمەپاڵەپەستۆیەكی نوێی دەریای ناوەراست بۆ سەر تەواوی ناوچەكانمان سبەی یەكشەمە 19-3-2023 لەكاتەكانی بەیانییەوە ئاسمانی ھەرێم بە زۆری دەگۆرێت بۆ نیمچە ھەور و ھەوری تەواو لەگەڵ ناجێگیربوونی كەش و ھەوای ناوچەكە بە زیادبوونی خێرای با لەنێوان 15 تا 35كم/س لە ئاراستەی باشوری رۆژھەڵاتەوە .
هەروەها دەڵێت: ناوبەناو ھەورە تریشقە و تاوە بارانی بەخوڕ لەناوچەی جیاجیادا ئەبێت لەگەڵ بارینی تەرزەش لەھەندێ كات و ناوچەدا بەتایبەتیش لەكاتەكانی نێوان نیوەرۆ بۆ ئێوارە ئاستی دابارینی باران و چالاكبوونی ھەورەبروسكە زیاتر ئەبێت و لەكاتەكانی ئێوارە و شەودا كاریگەری كەمدەبێتەوە ، پلەكانی گەرماش بەرێژەی 2 تا 3 پلە نزمدەبنەوە .
دەشڵێت: بۆ دوو سبەی دووشەمە  20-3-2023 لە ھەندێ كاتەكانی دوای نیوەرۆ بەدواوە بۆ كاتی شەو تاوە باران و ھەورە بروسكە لەناوچەی جیاجیاكاندا دەستپێدەكاتەوە بەڵام بەڕاورد بە سبەی كاریگەری كەمتر ئەبێت و ماوەی تاوە بارانەكان كورت خایان ئەبێت  .
هاوكات ماڵپەڕی ئەكواویزەری ئەمریكی كە تایبەتە بەزانینی كەشوهەوای جیهان پێشبینی كردووە كە لەسبەی یەكشەممەوە شەپۆڵێكی باران بارین دەست پێبكاتەوە بۆ ماوەی زیاتر لە هەفتەیەك بخاێنێ.