ئه‌ندامێكی ئه‌نجوومه‌نی سیاسی كۆمه‌ڵی دادگه‌ری رایده‌گه‌یه‌نێت، پارتی دركی به‌وه كردووه كه ناڕێكییه‌ك له ئیداره‌دانی دارایی له زۆنی سه‌وزدا هه‌یه.
شوان رابه‌ر، ئه‌ندامی ئه‌نجوومه‌نی سیاسی كۆمه‌ڵی دادگه‌ری، ناوه‌ڕۆكی هه‌ردوو سه‌ردانه‌كه‌ی پارتی و یه‌كێتی بۆ لای حزبه‌كه‌یان ئاشكرا ده‌كات و راگه‌یاند، شاندی یه‌كێتی له سه‌ردانه‌كه‌یدا باسی له كێشه داراییه‌كانی له‌گه‌ڵ پارتی كردبوو، له به‌رامبه‌ریشدا پارتی دركی به‌وه كردووه كه ناڕێكییه‌ك له ئیداره‌دانی دارایی له زۆنی سه‌وزدا هه‌یه.
هه‌روه‌ها گوتی: “پارتی پێیوایه له زۆنی سه‌وز وه‌كو پێویست داهات و خه‌رجی رێك و روون نییه”.
هه‌روه‌ها گوتیشی: داوامان له پارتی و یه‌كێتی كردووه، بۆ چاره‌سه‌ركردنی ناكۆكییه‌كان په‌نا نه‌به‌نه به‌ر هێز و توندوتیژی، چونكه ئه‌مه ئه‌زموون كراوه و لێی زه‌ره‌رمه‌ندبووین، كه‌ناڵه‌كانی چاره‌سه‌ر هه‌ن، كه حكومه‌ته، ده‌توانن له‌وێ ناكۆییه‌كان یه‌كلایی بكه‌نه‌وه”.
ده‌شڵێت: “پێویسته حكومه‌تی هه‌رێمی كوردستان خاوه‌نی كۆمه‌ڵێك بنه‌ما بێت، وه‌ك هاوسه‌نگی و شه‌راكه‌ت، له‌هه‌مان كاتدا كۆمه‌ڵی دادگه‌ری كوردستان گله‌یی خۆی ئاراسته‌ی پارتی و یه‌كێتی له‌سه‌ر شێوازی حوكمڕانی كردووه”.
روونیشیكرده‌وه، ململانێی نێوان پارتی و یه‌كێتی له كۆنه‌وه هه‌یه، كه زیانی زۆری به هه‌رێمی كوردستان گه‌یاندووه، له كۆتایدا خه‌ڵكی كوردستان زه‌ره‌رمه‌ندی یه‌كه‌من.