بهرپرسی كارگێڕیی بەڕێوەبەرایەتیی پەروەردەی قەزای شنگال ڕایگەیاند، كۆنترین قوتابخانەی خوێندنی كوردی لە قەزای شنگال كراوەتەوە، كە لە ساڵی 1970 دروست كراوە و دواتر لەبەر بارودۆخی ئەوكات داخرا، وا جارێكی دیكە ئەو قوتابخانەیە بۆ خوێندنی كوردی كرایەوە.
شههاب ئهحمهد، بهرپرسی كارگێڕیی بەڕێوەبەرایەتیی پەروەردەی قەزای شنگال رایگەیاند: “ساڵی 1970، قوتابخانەیەك بۆ خوێندنی كوردی لە شنگال بە ناوی قوتابخانەی ئومێد كرایەوە، بەڵام دوای ئەوەی دۆخەكە گۆڕا و شەڕ دەستی پێكردەوە، ئەو قوتابخانەیە داخرا و خوێندنی كوردی قەدەغە كرا، تا ساڵی 2003 دوای ڕووخانی ڕژێمی بەعس، جارێكی دیكە ئەم قوتابخانەیە بۆ خوێندنی كوردی هەر بە ناوی قوتابخانەی ئومێد كرایەوە و بەردەوام بوو، تا ساڵی 2014، كاتێ ڕێكخراوی تیرۆریستیی داعش پەلاماری شنگال دا و خەڵكەكەی جینۆساید كرد و ئەوەی ما ئاوارە بوو، قوتابخانەكەش دیسان داخرایەوە.”
ئاشكراشی كرد: “بۆ خوێندنی ئەمساڵی 2022، بۆ جاری سێیەم قوتابخانەی ئومێد، ئەمجارە بە ناوی قوتابخانەی ژیان لە قەزای شنگال كرایەوە، كە لە سەردەمی شۆڕشی ئەیلوول بۆ خوێندنی كوردی دروست كرابوو.”