گوتەبێژى پۆلیسى ڕاپەڕین ئاشکراى کرد لە شارى ڕانیە کەسێکیان دەستگیر کردووە کە بە شێوەی قاچاخ هاووڵاتییانی ناردووەتە دەرەوەی هەرێمی کوردستان.
شۆڕش ئیسماعیل، گوتەبێژى پۆلیسى ڕاپەڕین رایگەیاند: “دواى لێکۆڵینەوە و بەدوداچوون، لەسەر سکاڵاى هاووڵاتییان و دواى وەرگرتنى فەرمان و بڕیارى دادوەرى لێکۆڵینەوە، تۆمەتبارێکمان لە شاری ڕانیە دەستگیر کرد کە بەشدار بووە لە ناردنە دەرەوەى ئەو کۆچبەرە کوردانەی ساڵی ڕابردوو لە کەناڵی ئینگلیز یەختەکەیان ژێر ئاو کەوت و ژمارەیەکیان گیانیان لەدەست دا و تا ئێستاش تەرمی بەشێکیان نەدۆزراوەتەوە”.
گوتیشى: “ئێستا تۆمەتبارەکە، کە تەمەنى 36 ساڵە، بەند کراوە و لێکۆڵینەوە لەگەڵیدا دەستى پێ کردووە”.