پۆلیسی راپەڕین یەکێک لەو قاچاخچیانە دەستگیردەکات کە پێشتر فەرمانی دەستگیرکردنی بۆ دەرچووە لەسەر دۆسێی ژێرئاوکەوتنی بەلەمێکی کۆچبەران لە نۆکەندی ئینگلیز کە 34 کۆچبەری تێدابوو و بەهۆیەوە 28 یان خنکان.
رۆژی 24-11-2021 بەلەمێک لەنێوانی فەرەنسا و بەریتانیا لە نۆکەندی ئینگلیز ژێر ئاو کەوت کە 34 کۆچبەری تێدابوو، 28 کەس بوونە قوربانی و تەرمەکانیان دۆزرایەوە، دوو کەس بە زیندوویی رزگاریان بوو کە یەکێکیان کورد و ئەوەی دیکە هاووڵاتییەکی سۆماڵی بوو، چوار کەسیش بێسەروشوێن بوون کە سێیان کوردن و ئەوەی دیکەش هاووڵاتییەکی میسرییە.
رۆژی سێشەممە 18-10-2022، رەنج مستەفا ئەمین، پارێزەری ئەو کەیسە لە کۆنگرەیەکی رۆژنامەڤانیدا ئەوەی خستەڕوو کە کاتی خۆی لەسەر ئەو دۆسیەیە 3 سکاڵایان تۆمارکردووە “سکاڵی یەکەم لەسەر قاچاخچییەکان، سکاڵای دووەم لەسەر حکومەتی فەرەنسا و بەریتانیا، سکاڵی سێیەمیش سۆراخی بێسەروشوێنەکان.”
بە گوتەی رەنج مستەفا “ئەمڕۆ بەڕێوەبەرایەتی پۆلیسی راپەڕین لەڕێگەی سەرجەم ئەفسەر و کارمەندەکانیانەوە بە تایبەت بنکەی پۆلیسی حاجیاوا و ماکۆک و هێزی چالاکییە مەدەنییەکان توانرا یەکێک لە تۆمەتبارەکان دەستگیر بکەن لە یەکێک لە فەرمانگەکانی حکومەتی هەرێمی کوردستان کە پێشتر فەرمانی دەستگیرکردنەکەی لەڕێگەی دادگەی حاجیاواوە دەرچووە و گشتاندنی بۆ کرابوو. ئەو تۆمەتبارە لەکاتی ئەنجامدانی مامەڵەیەکی یاسایی دەستگیرکراوە.”
هەر لە کۆنگرە رۆژنامەڤانییەکەدا زانا مەمەند، برای یەکێک لە بێسەروشوێنبووکان و وەکو کەسوکاری قوربانییەکان داوای لە حکومەتی هەرێمی کوردستان کرد “ئەو تۆمەتبارەی ئەمڕۆ دەستگیرکراوە، بە هیچ پاساوێک ئازادی نەکات، بەپێی یاسا و ماددە یاساییەکان مامەڵەی لەگەڵدا بکرێت.”
بە گوتەی زانا مەمەند ئەوان وەکو کەسوکاری قوربانییەکان دەزانن کێ قاچاخچی کۆچبەرەکان بوونە، “3 قاچاخچیان پەیوەست بوون بەو بابەتە، ئەمڕۆ خۆشبەختانە یەکێکیان دەستگیرکرا”.