وەزارەتی کارەبا ڕایگەیاند، کاری چاکسازی لە کێڵگەی کۆرمۆر سەرکەوتوو بوو، بەمەش توانای بەرهەمهێنانی کارەبا گەڕایەوە باری ئاسایی خۆی.
لە ئاگادارییەک وەزارەتی کارەبای هەرێمی کوردستان ڕایگەیاند: ئاگاداری هاوبەشانی کارەبا دەکەینەوە کە پرۆسەی چاکسازیی لە کێڵگەی کۆرمۆری غازی بەسەرکەوتوویی جێبەجێ کرا و بارودۆخی غاز ئاسایی بووەوە.
ڕاشیگەیاند: بەمەش توانای بەرهەمهێنانی کارەبا گەڕایەوە باری ئاسایی خۆی بە توانای 3400-3500مێگاوات کارەبا.
ئەمەش لەدوای ئەوە دێت کە وەزارەتی کارەبا ڕایگەیاندبوو، لە ڕۆژانی 07 بۆ 09ـی 10ـی 2022 چاکسازی لە کێڵگەی کۆرمۆر دەکرێت و بەمەش هەناردەی گازی سروشتی بۆ وێستگەکانی کارەبا بە بڕی 230 ملیۆن پێ سێجا کەم دەبێتەوە و لە ئەنجامدا 1250 مێگاوات بەرهەمهێنانی کارەبا کەم دەبێتەوە.