سەرۆکی لیژنەی موەلیدە ئەهلییەکانی پارێزگای هەولێر رایدەگەیێنێت، خشتەی پێدانی کارەبای موەلیدە لە 07-10-2022 بەمشێوەیە دەبێت، لە 6:30ی بەیانی تاوەکو 8:00ی بەیانی، 12:00ی نیوەڕۆ تاوەکو 2:00ی شەو و کاژێر 10:00ی بەیانی تاوەکو 2:00 شەو کارەبای موەلیدە دەبێت.
ئەندازیار قارەمان مەولوود، سەرۆکی لێژنەی موەلیدە ئەهلییەكان لە پارێزگای هەولێر رایگەیاند، “بەهۆی بەرزیی نرخی ئەمپێری کارەبای موەلیدە لە مانگەکانی پێشوودا داواکارییەکی زۆری خەڵکمان پێگەیشت لەسەر کەمکردنەوەی پێدانی کاژێرەکانی کارەبای موەلیدە، بۆیە ئێمەش بۆ بارسووککردنی هاووڵاتییان بڕیاری کەمکردنەوەی کاژێرەکانی کارەبای موەلیدەمان دا”.
سەرۆکی لیژنەی موەلیدە ئەهلییەکانی پارێزگای هەولێر رایدەگەیێنێت، “خشتەی پێدانی کارەبای موەلیدە ئەهلییەکان بە هاونیشتمانییان گۆڕانکاری بەسەردا هاتووە و بۆ ئەو مەبەستە ئاگاداری خاوەن موەلیدەکانی ناو شاری هەولێر و دەوروبەرمان کردووەتەوە، کە لە 7-10-2022 وە گۆڕانکاری لە بەرنامەی پێدانی کارەبای موەلیدەكاندا دەکرێت”.
سەرۆکی لیژنەی موەلیدە ئەهلییەكان لە پارێزگای هەولێر دەڵێت، “بەپێی ئەو هاوئاهەنگییەی لەگەڵ بەڕێوەبەرایەتیی کارەبای هەولێر هەمانە پێیان گوتووین کە لەمەودوا پێدانی کاژێرەکانی کارەبای نیشتمانی زیاد دەبێت، بەتایبەت کە کەشوهەوا بەرەو فێنكی دەچێت و ئەگەر هیچ گرفتێک نەیەتە پێشەوە شەوانە بەبەردەوامی لە کاژێر 2ی شەو تا بەرەبەیان کارەبای نیشتمانی دەبێت، بۆیە ئەو کاتانەی کارەبای موەلیدەی تێدا نادرێ بە کارەبای نیشتمانی پڕدەکرێتەوە، ئەمەش وادەکات بۆ مانگەکانی داهاتوو نرخی ئەمپێری کارەبای موەلیدە بە رێژەیەکی بەرچاو کەم بێتەوە”.
لەبارەی نرخی ئەمپێری کارەبا لە مانگەکانی داهاتوودا ئەندازیار قارەمان مەولوود گوتی، “دەبێت بۆ ماوەی چەند رۆژێک موەلیدەکان کار بەم خشتە نوێیە بکەن، ئەو کات نرخی ئەمێری کارەبا لە ماوەی مانگەکەدا دەردەکەوێت”.
لیژنەی بەدواداچوونی موەلیدە ئەهلییەکان ئەوەشی خستەڕوو، “ئەو کاتانەی لە خشتەکە دیاری کراون، هەرکاتێک کارەبای نیشتمانی نەبوو، دەبێت موەلیدە کار بکات”